O Partido Comunista dos Traballadores da
Galiza (PCTG) estará presente nas eleccións ao Parlamento de Galiza do 5 de
abril concorrendo nas 4 circunscricións coas súas candidaturas, co obxectivo de
ofrecer unha proposta política independente para a clase obreira, que responda
aos intereses e necesidades de quen todo o produce e non recibe a cambio máis
que explotación, salarios de miseria, precariedade, emigración e represión.
A presenza de candidaturas comunistas do
PCTG, no conxunto de Galiza por primeira vez nunhas eleccións autonómicas,
permitirá que a clase obreira e o pobo traballador poidan expresar nas urnas o
seu rexeitamento á ofensiva do capital e da gran patronal contra os nosos
dereitos e condicións de vida, e dar o seu apoio a un programa que sitúe a
clase obreira e os traballadores á ofensiva:
• Pola
recuperación dos dereitos arrebatados e a conquista de novos dereitos sociais,
económicos, políticos e culturais.
• Polo pleno
emprego, pola soberanía industrial, enerxética e agraria.
• Pola ruptura
coas estruturas imperialistas e as alianzas monopolistas internacionais,
económicas, políticas e militares.
• Por uns
servizos públicos para o noso benestar e non para enriquecer as grandes
empresas.
• Por unha
vivenda digna.
• Pola
recuperación da produción, do agro e a industria.
• Para que o
noso país non siga a baleirarse e a nosa mocidade non siga a emigrar.
• Pola defensa
da nosa lingua e da cultura galega obreira e popular.
• Pola
nacionalización dos sectores estratéxicos da economía.
• Por unha
economía planificada para satisfacer as necesidades do pobo traballador.
• Polo poder
para quen producimos toda a riqueza e aseguramos co noso traballo todos os servizos.
O PCTG defende o programa necesario para
a clase obreira, o programa que representa os nosos intereses tanto inmediatos
como futuros. Porque xa estamos vendo que rápido as promesas de cambio e de
progreso que nos vendían uns e outros se converten en papel mollado, e as
ilusións en enganos, precisamos canto antes dotarnos dunha forza política que
dea poder e organización á clase obreira.
A campaña electoral que se abrirá o 20 de
marzo será unha nova oportunidade para dar a coñecer a nosa proposta política
e fortalecer as fileiras do Partido
Comunista diante das importantes loitas que se aveciñan.
Galiza para a Clase
Obreira!!
Comité Nacional do
PCTG.
Galiza, 4 de marzo
2020.