O pasado xoves 14 de novembro, respondendo ao
chamamento do seu Comité de Empresa, as traballadoras do servizo de atención ao
cliente do monopolio enerxético NATURGY (antes Gas Natural-Fenosa), manifestáronse
diante da sede desta multinacional en Ourense.
Este servizo, que foi externalizado á empresa
UNITONO, do sector de centros de chamadas (telemarqueting), trasladaríase agora
a Colombia (e a Reus-Tarragona en menor medida). As consecuencias desta decisión
serían a eliminación de máis de 130 empregos en Ourense, xa que UNITONO ten
coma único cliente a Naturgy.
Ao mesmo tempo, a deslocalización significaría a
perda da atención en galego para os clientes de Naturgy, contribuíndo esta
multinacional á discriminación contra a poboación galegofalante.
Xa sabiamos que ás empresas capitalistas non lles
importa nada que os traballadores queden sen emprego. Pero desde os tempos de
Franco, esta empresa ten unha longa traxectoria de saqueo da riqueza enerxética
na Galiza, cos encoros de Fenosa, a mina das Encrobas e a central de Meirama.
Agora coa escusa da mal chamada “transición ecolóxica”, as multinacionais da
enerxía pechan as súas instalacións produtivas, deslocalizan servizos esenciais
botando os traballadores á rúa e esquilman os nosos petos con facturas astronómicas
de luz e gas. Miles de familias traballadoras pasan frío en inverno. Quen sabe
cantas traballadoras despedidas de UNITONO terán dificultades este inverno para
pagar a súa factura de enerxía?
E se non lles importan os traballadores, menos lles
ha importar a nosa lingua ou a cultura do pobo.
Dende a organización do PCTG en Ourense,
solidarizámonos coas traballadoras e traballadores do servizo de atención ao
cliente de Naturgy na súa loita polo emprego. Esiximos o mantemento dos seus
postos de traballo e a garantía da atención en galego.
O Partido Comunista dos Traballadores da Galiza
defende que a enerxía é un dereito básico do pobo traballador, e non debe ser
unha fonte de lucro privado.
Chamamos á clase obreira a loitar:
Pola nacionalización do sector enerxético.
Contra a subcontratación ou deslocalización dos
servizos de atención ao cliente, e pola incorporación do persoal externalizado
na empresa principal.
Por unha atención ao cliente na lingua da súa
escolla.
PCTG-Ourense