Ástor García, cabeza de lista por Madrid e candidato á
Presidencia do Goberno polo Partido Comunista dos Traballadores de España
(PCTE), debullou algúns dos principais puntos do seu programa electoral para
este 10N, ao que concorren coa lema “Elixe o necesario”. García explica o
sentido desta lema dicindo que temos escoitado a miúdo que o que propomos está
moi ben pero que non é posible, e sobre isto hai que dicir que nada do que
propomos no noso programa é imposible, é máis, todo iso é necesario, e xa que
logo, inaprazable.
Ástor García, que é Secretario Xeral do PCTE, explica que “o
país que queremos construír non se vai facer realidade dun día para outro,
senón que será o resultado dun proceso de acumulación de forzas obreiras e
populares”. En palabras de García, “os tempos son chegados de dicir as cousas
claras, de dar respostas de clase aos problemas do país; cando din que non é
posible derrogar as reformas laborais, cando din que non é posible xubilarse
antes dos 67, cando din que non é posible soster unha educación e sanidade
públicas, cando din que non se pode controlar os prezos da vivenda ou
ilegalizar as casas de apostas, hai que dicir que nada que sexa absolutamente
necesario pode ser imposible”.
Neste sentido, o candidato do PCTE interpela ao potencial
votante: “Non se trata só do que nós propomos, o noso programa enriqueceuse con
respecto ao das anteriores eleccións, si, pero o importante é o que ti podes
facer”. No programa do PCTE, como nos seus actos públicos, esta é unha idea
habitual, a da necesidade de organizarse co Partido Comunista para loitar no
día a día, desde o centro de traballo, os barrios populares ou o centro de
estudos.
“Fálase moito do país, pero que país -pregunta García-,
porque o país dos monopolios, o do Ibex-35 que xestionan e representan con
diferentes matices todos os partidos do Parlamento, non é o noso. O noso país é
outro e pode chegar a ser outro moito máis distinto aínda, un país para a clase
obreira, un país cos traballadores no poder”.
O PCTE concorre ás eleccións do 10N como a principal sigla
comunista en España, estará presente en 37 circunscricións, dez máis que nas
candidaturas que presentou en abril, cando concorreu tan só unhas semanas
despois de celebrar o acto de presentación en Madrid da nova sigla PCTE.