A violencia cara ás mulleres non é algo alleo ao sistema
capitalista
O sistema maltrátanos cando cobramos menos que un home polo
mesmo traballo. Maltrátanos cando permite e defende a compra dos corpos das
mulleres para parir fillos ou fillas de xente sen escrúpulos. Maltrátanos cando
permite que un home condenado por violencia machista poida ver aos nosos fillos
e fillas. Maltrátanos cando se nos prohibe abortar e debemos facelo en clínicas
privadas ou, mesmo, clandestinas.
Dentro do capitalismo é imposible acadar calquera tipo de
igualdade para as mulleres traballadoras
A nós, as obreiras, dános igual quen nos explote, se é home
ou muller. A nós, as mulleres traballadoras, dános igual quen estea na cima do
aparello burgués. Ás mulleres da clase obreira o que nos interesa, e polo que
loitamos, é por que non sigan a
asasinarnos, mostra máis visible da violencia machista. As mulleres
traballadoras queremos vivir sen medo e orgullosas de ser o que somos, xunto ao
resto da nosa clase. Como sempre, somos as mulleres traballadoras as que máis
sufrimos este tipo de violencia. Nin a xustiza nin a lexislación burguesa van
facer nada por protexernos nin a nós nin aos nosos fillos e fillas.
Loitar por un país para a muller traballadora
As mulleres traballadoras non queremos máis, pero tampouco
menos que o que nos corresponde: protección dos nosos dereitos e dos nosos
fillos e fillas; iguais dereitos en todos os aspectos da vida. Só cun país ao
servizo da clase obreira poderemos porlle fin á explotación, á discriminación e
á desigualdade. Só cun país para a muller traballadora poderemos garantir o
noso futuro e o dos nosos fillos e fillas. Só cun país para a clase obreira,
poderemos conseguir rematar coa lacra do machismo.