O Partido Comunista dos Traballadores de España (PCTE)
expresa toda a súa solidariedade coa loita do pobo ecuatoriano e,
especialmente, dos nosos camaradas do Partido Comunista do Ecuador (PCE), que
se ergueron contra o Decreto presidencial e a reforma económica, o paquetazo,
que desde o pasado 1 de outubro o presidente Moreno pretende impor ao conxunto
do pobo ecuatoriano. Un decreto que eleva o valor dos combustibles, do custo
dos bens básicos, reduce as prestacións salariais públicas e que busca facer
pagar ao pobo ecuatoriano as consecuencias da crise capitalista baixo o mandato
dos imperialistas.
Desde hai días o país está inmerso nunha vaga de combativas
mobilizacións que puxeron en apuros ao goberno, que tivo que fuxir a Guayaquil.
A clase obreira organizada, o
campesiñado, o movemento popular ecuatoriano está a amosar o seu compromiso e
decisión contra estas medidas, contra o paquetazo, como se viu coa folga
nacional convocada o pasado 9 de outubro.
A pesar de que xa se contabilizan 5 mortos, entre eles
líderes do movemento indíxena, máis de 550 feridos e case 1.000 detidos, debido
ás actuacións da policía, que está a empregar métodos brutais de represión para
conter a mobilización, os dirixentes da mesma prometeron non parar até acadar
os seus obxectivos, entre eles reverter o Decreto presidencial e o paquetazo. Nun desesperado
intento de sufocar e reprimir a loita popular, o goberno ecuatoriano recorreu ao estado de excepción, a un toque
de queda e a declaracións incendiarias que tentan culpar ao expresidente Rafael
Correa e ao goberno venezolano de ser os organizadores, desviando así a
atención das súas propias responsabilidades como goberno.
Denunciamos o apoio do goberno español a Lenín Moreno nas
recentes declaracións de Josep Borrell, Ministro de Asuntos Exteriores. Vemos
como o Goberno de España defende as posicións que atentan a dignidade dos pobos
e os traballadores. Xa o fixo apoiando o intento de golpe de estado de Juan
Guaidó en Venezuela e repíteo de novo. Os seus apoios internacionais sempre se
afastan claramente da solidariedade e a defensa dos Dereitos Humanos que di
defender.
Desde o PCTE apoiamos firmemente a convocatoria de folga e
desexamos os maiores éxitos na mesma. Así mesmo, seguiremos exercendo a nosa
solidariedade mediante a difusión entre a clase obreira e os sectores populares
do noso país do exemplo do pobo
ecuatoriano e do PC do Ecuador nesta loita contra as medidas
político-económicas que os afogan, e denunciando a represión policial que o
goberno capitalista utiliza para esmagar a resistencia popular ecuatoriana.
Todos ás rúas! Vai caer!
Viva a solidariedade internacionalista!
Buró Político do PCTE
12 de outubro, 2019
Fonte: PCTE
Tradución a galego pola Revista FORXA