Ante o anuncio da multinacional italiana ENEL de
pechar a central térmica de ENDESA nas Pontes, o Partido Comunista dos
Traballadores da Galiza manifesta o seu total rexeitamento a esta medida, a súa
solidariedade cos traballadores afectados, e a exixencia da inmediata
nacionalización do conxunto do sector enerxético, da minería así como de todos
os sectores económicos estratéxicos.
Mediante unha cortina de fume chamada “transición
ecolóxica”, estase a encubrir un auténtico proceso de desertización industrial
de Galiza, que deixa un regueiro de milleiros de desempregados e desempregadas,
afectados directa e indirectamente polos peches de empresas.
Meirama, Alcoa Coruña, Poligal, Ferroatlántica,
Endesa, (e as ameazas pendentes sobre Alcoa San Cibrao ou Gamesa-Siemens), son
as expresións dunha reconversión capitalista que, despois de acumular montañas
de ganancias deixando aquí explotación e desfeita ecolóxica, procura agora
noutros sitios ou con outras actividades máis lucrativas, seguir aumentando as
fortunas dun puñado de parasitos.
Os gobernos de Felipe González e de Aznar
privatizaron (e malvenderon) ENDESA, unha empresa pública de 27 mil traballadores
daquela, converténdoa nun fabuloso negocio para ACCIONA e posteriormente para a italiana ENEL.
Durante a presidencia de Borja Prado na dirección
da empresa, ENEL chuchou de ENDESA máis
26 mil millóns de euros en dividendos para os seus accionistas. 3,18 millóns recibiu o señor Prado en
2017, e 2,2 millóns para o señor Bogas,
conselleiro delegado. E non foron os únicos, Aznar tamén comeu aí (e Felipe
González cobraba en Gas Natural). Mentres ENEL descapitaliza ENDESA, a
negociación do Vº Convenio Marco sigue bloqueada, e as familias traballadoras
temos que pagar facturas da luz cada vez máis astronómicas.
Logo de recibir durante estes anos centos de
millóns de euros de axudas públicas para a modernización das unidades
produtivas e as medidas de redución da contaminación, logo de xurar e perxurar
que a central das Pontes seguiría operando grazas a estas medidas tecnolóxicas,
resulta que ENEL pecha a térmica debido ao encarecemento dos chamados “dereitos
de emisión de CO2”. Mais ese “encarecemento” non é resultado dunha dificultade
material, produtiva ou tecnolóxica. É o resultado da máis pura especulación nos
mercados financeiros, nos que as grandes empresas capitalistas negocian e
subastan eses dereitos de emisión de carbono, converténdoos nun simple produto
especulativo, nunha nova burbulla financeira. ENEL non pecha a térmica porque
contamine ou non sexa rendible, senón para gañar máis diñeiro.
Unha vez máis, pretenden que a clase obreira pague
os pratos rotos do festín da burguesía. Antes era coa escusa da crise. Agora é
co pretexto do encarecemento das emisións de CO2. Mañá, será pola nova recesión
económica que xa vén chegando.
Baixo ningunha forma de capitalismo, nin no máis
verde, haberá solución definitiva para os problemas dos traballadores e
traballadoras. A clase obreira debe tomar o control do que é seu, porque foi
construído co seu traballo.
Precisamos enerxía e industrias, nas mans do pobo
e ao servizo do pobo. Precisamos a permanencia das actividades produtivas e
asegurar un futuro económico e produtivo na Nosa Terra, coas medidas de
protección ecolóxicas que sexan necesarias, e libres de parasitos capitalistas.
O Partido Comunista dos Traballadores da Galiza
chama a clase obreira e o pobo traballador a non aceptar os falsos dilemas do
capital e dos gobernos ao seu servizo, que pretenden que paguemos nós pola súa
“transición”.
Chamámoste a incorporarte ao Partido Comunista
para construírmos un País para a clase obreira.
Pola nacionalización da
enerxía e dos sectores estratéxicos!!
Por un país para a clase
obreira!!
PARTIDO COMUNISTA DOS
TRABALLADORES DA GALIZA ( PCTG)