Este verán pechouse cun balance atroz de violencia machista,
violacións e asasinatos de mulleres. 2019 foi un dos anos máis sanguentos da
última década.
Coma sempre, as vítimas, as mulleres con menos recursos, as
dependentes economicamente, as que no poden permitirse cambiar de domicilio, de
traballo ou de cidade, as mozas dos barrios obreiros e populares.
Á nosa discriminación no ámbito laboral, á nosa carga de
traballo nas tarefas reprodutivas (crianza, coidados, tarefas domésticas…), á
mercantilización dos nosos corpos, úneselle a máxima expresión de
discriminación sobre a muller traballadora: a agresión, a violación e o asasinato.
A lexislación e a xustiza burguesas non protexen as mulleres
do maltrato e da violencia en todas as súas expresións. Polo contrario, perséguese
ás mulleres por loitar, por defender os dereitos que nos corresponden.
Esta violencia está intrinsecamente ligada ao sistema
capitalista. Un sistema que nos explota
como clase e nos maltrata como mulleres.
Nin a igualdade nin a seguridade son posibles para as mulleres
traballadoras dentro do capitalismo. Un sistema que nos explota, nos oprime e
nos discrimina, que trafica con nós e nos mercantiliza, que tolera e promove o
acoso sexual e laboral, que nos persegue e reprime cando nos organizamos e loitamos,
é incapaz de garantirnos os nosos dereitos incluída a supervivencia.
Denunciamos a utilización que, desde as forzas máis escuras
do capital e a reacción, se fai da violencia contra as mulleres buscando un
clamor unánime en pro do endurecemento do Código Penal e da represión. Estas
son armas que en última instancia se volverán contra o movemento obreiro e
popular e non contra os asasinos de mulleres.
Denunciamos a perigosa onda racista que dirixe o foco cara
á orixe nacional dos violadores e non cara á orixe social e clasista da
violencia do sistema capitalista contra as mulleres.
Non pasarán, os que dese xeito queren dividir a clase
obreira para perpetuar todas as formas da opresión e da explotación.
Organicémonos como clase xunto aos nosos compañeiros para
combater e reivindicar os nosos dereitos e poñer fin á violencia contra as mulleres
en todas as súas formas.
Constrúamos unha sociedade libre do medo, da violencia e
de todas as formas da opresión e da explotación.
20/9/2019
PCTG