O aborto
clandestino, cuxa primeira causa é o medo a perder o traballo, sigue a ser unha
das principais causas de morte para as mulleres da nosa clase no noso país e no
mundo.
A
deterioración do sistema público de saúde en España, a súa escalada cara á
privatización, o dereito de obxección sen restricións para os profesionais
sanitarios, as trabas burocráticas e o desvío cara as clínicas privadas que
está levando a cabo a sanidade pública continúan convertendo a nosa saúde
sexual e reprodutiva en negocio para os grandes monopolios da sanidade privada e
en inaccesible para moitas mulleres da clase traballadora.
Tanto
o dereito á maternidade como á interrupción do embarazo seguen a ser papel
mollado para moitas traballadoras, para as migrantes e solicitantes de asilo,
para as mozas de extracción obreira e popular.
O exercicio
efectivo dos nosos dereitos sexuais e reprodutivos, instaurado nos países
socialistas un século atrás, é imposible baixo as condicións do capitalismo.
A saúde
reprodutiva é moito máis ca unha liberdade individual: é un dereito social
conquistado colectivamente pola clase traballadora na súa loita, como parte do
dereito a unha saúde pública gratuíta e universal. O capitalismo está
liquidando esa mesma sanidade pública para convertela nun espazo de acumulación
de capital. Os redactores da lei burguesa serven eses mesmos intereses privados
dos grandes grupos monopolistas.
Queremos
a nosa saúde sexual fóra do Código Penal e fóra das clínicas privadas. A nosa
saúde non é negocio nin delito!
Loitamos
por unha educación sexual e unha información rigorosa na escola, nos centros de
saúde, nos nosos barrios e vilas. Polo acceso libre e gratuíto aos métodos
anticonceptivos e de planificación, por un estado laico e pola derrogación de
toda lei de ensino que impulse a relixión e exclúa a educación sexual da escola
pública.
Este
28 de setembro o Partido Comunista chama
as traballadoras e os traballadores a loitar pola plena despenalización do
aborto e a inclusión da nosa saúde sexual e reprodutiva na sanidade pública,
como parte esencial do Programa de loita das mulleres traballadoras e do conxunto
da clase obreira.
Loitemos
por un país para as traballadoras e os traballadores: Por un país para a clase
obreira!