O pasado 9 de abril, o compañeiro Fran, traballador de GAM no
taller de Meres (Asturias) foi despedido pola empresa baixo a figura dun
despedimento disciplinario.
Os datos desmenten teimudamente a escusa forzada do
despedimento, pero á súa vez, este toma a forma dun despedimento disciplinario
dado que o obxectivo da empresa é eliminar un traballador “molesto” para a
empresa pola súa actividade política e sindical.
GAM utiliza o despedimento disciplinario para afastar a quen
defenden os seus dereitos, deixando moi claro cales son as súas pretensións:
extorsionar mediante o medo ao resto do cadro de persoal para que permanezan
nun estado de submisión inadmisible. E isto é un acto inaceptable de represión.
Coincide ao mesmo tempo, que este compañeiro, un mes e un
día antes de ser fulminantemente despedido, exerceu o seu dereito á folga
realizando o paro de 2 horas legalmente convocado o 8 de marzo no Día
Internacional da Muller Traballadora, levaba nove meses á espera (activa) de
que se lle concedese a categoría acordada e participaba á vez dun proceso de
preparación das listas para as eleccións sindicais que terán que realizarse a
finais deste verán no seu taller.
Desde o Partido Comunista dos Traballadores da Galiza (PCTG)
chamamos a todos os traballadores de GAM e compañeiros de Fran a apoiar a súa loita
fronte a un despedimento que non vén sendo outra cousa que a punta de lanza da
batalla entre a empresa e os traballadores polos dereitos dos traballadores e por
unha mellora non só das condicións individuais de cada traballador, senón de
todo o persoal de GAM por todo o territorio.