MEDIDAS PARA ARTICULAR AS LOITAS NA NOSA CIDADE
A nosa cidade, non nos pertence. Róubannola día a día os capitalistas, a
gran patronal e os seus representantes.
No Partido Comunista, queremos construír un Vigo para a clase obreira.
Un Vigo no que os dereitos e os intereses da maioría traballadora sexan os
decisivos.
O Partido Comunista dos Traballadores da Galiza presenta a súa candidatura
ás eleccións municipais en Vigo, encabezada por Laura Quintillán, co obxectivo de dar voz á clase obreira e ao
conxunto do pobo traballador defendendo 4 grandes eixos de loita que constitúen
unha guía para a acción e a mobilización:
- Reindustrialización da comarca e emprego con dereitos
- Defensa e recuperación dos servizos públicos
- Atención aos barrios e ás necesidades das familias traballadoras
- Vivenda digna para a clase obreira
Pensamos que é urxente que a clase obreira e o conxunto dos traballadores
dispoñan dunha voz que exprese os intereses e as necesidades da maioría
traballadora desta cidade. Convidamos as traballadoras e traballadores de Vigo
a reforzar as filas do Partido Comunista. A acompañarnos na loita por un Vigo
para a clase obreira.
Reindustrialización da comarca e emprego con
dereitos:
Vigo e a súa comarca levan anos sendo vítimas dun proceso de
desindustrialización baixo os auspicios da Unión Europea, que está a liquidar o
sector naval, xunto coa pesca e o agro galegos, deslocalizando industrias e
precarizando o mundo do traballo. A clase obreira e o pobo traballador precisan
dunha voz que dea forza ás súas reivindicacións e á loita:
- Pola derrogación das contrarreformas laborais
- Pola nacionalización da enerxía, a banca e os seguros,
- Pola expropiación das empresas que deslocalizan a súa produción
- Pola prohibición das ETT, das mutuas sanitarias e das horas extra inxustificadas
- Pola semana laboral de 35 horas sen redución de salario
- Pola xubilación aos 60 anos
- Polo estrito control da aplicación dos convenios e dereitos laborais
- Polo cese das subcontratacións en cadea
Defensa e recuperación dos servizos públicos:
Os sucesivos gobernos municipais non fixeron máis que xestionar en
beneficio das grandes empresas e monopolios capitalistas que parasitan os
servizos públicos da cidade. Os propietarios de FCC, CESPA, Althenia, Vitrasa,
etc, acumulan fortunas a conta dos nosos impostos e empeorando cada día máis as
condicións de traballo e salario dos seus traballadores e traballadoras.
- Pola desprivatización dos servizos públicos municipais e a subrogación do seu persoal nun Ente Público de Servizos Municipais.
- Por unha sanidade e educación exclusivamente públicas e gratuítas.
Os barrios de Vigo, nos que vive a maioría da poboación traballadora, están
desatendidos, discriminados fronte aos gastos suntuarios e proxectos faraónicos
que se concentran nunha limitada zona privilexiada, na que se favorece o
negocio de multinacionais do comercio.
O Partido Comunista loita por unha xusta e proporcionada dotación de
servizos aos nosos barrios populares:
- Queremos a mellora integral do transporte público en frecuencias, dotación e prezos.
- Queremos unha rede de servizos sociais que cubra as necesidades de todos e todas e sente as bases para a emancipación das mulleres. (Creación dunha rede pública de lavandarías, planchadurías, despachos de comida para levar, comedores públicos, e atención á infancia, ás persoas maiores ou dependentes).
- Queremos dotacións de ocio, deporte e cultura en cada barrio e a erradicación das casas de apostas.
- Queremos que se priorice o deporte de base.
- Queremos o coidado dos nosos montes e atención ao Vigo rural.
Vivenda digna para a clase obreira:
Nesta cidade, na que abundan as vivendas baleiras, temos que padecer uns
alugueiros entre os máis caros de España. Centos de familias traballadoras
foron expropiadas da súa vivenda por bancos e outras mafias especuladoras. Ducias
de persoas viven (e morren) na rúa por falta dun teito. En Vigo, milleiros de
familias traballadoras deben elixir entre pagar o seu alugueiro mensual (ou a
hipoteca do piso) e quentarse en inverno.
O Partido Comunista loita pola expropiación dos especuladores e a garantía
dunha vivenda digna para a clase obreira.
- Pola expropiación das vivendas actualmente en mans dos bancos e os fondos voitre.
- Pola conformación dunha bolsa de vivendas públicas en réxime de alugamento, con prezos fixos e regulados, para mozos/as, estudantes, pensionistas, traballadores e traballadoras.
- Tolerancia cero contra os desafiuzamentos, cortes de luz, auga, gas, por parte de bancos e compañías eléctricas.
- IBI gratuíto para primeira vivenda. IBI progresivo a partir da segunda vivenda en propiedade.
Para dar voz e forza á clase obreira, este 26 de maio.
Vota Partido Comunista dos Traballadores da Galiza.
Por un Vigo para a clase obreira.
#VotaPCTG