Até agora, todas as decisións importantes
tomáronse para defender e promover intereses que son alleos a esa maioría
traballadora á que, como Partido Comunista, nos diriximos exclusivamente no
noso traballo diario e tamén durante as campañas electorais.
Cando se reformou o Estatuto dos Traballadores,
foi para abaratar o noso despedimento ou para facilitar os Expedientes de
Regulación de Emprego.
Cando se reformaron as pensións, foi para
obrigarnos a traballar máis anos e cobrar menos pensión.
Cando se reformaron a sanidade ou a educación,
foi para permitir a entrada masiva das empresas privadas na xestión e
prestación deses servizos esenciais.
Cando se tentou paralizar a suba de prezos no
alugamento de vivenda, terminouse por legalizar a ocupación mercantil dos nosos
barrios históricos.
Isto son só algúns exemplos que deixan claro
que non podemos seguir así. O noso país non nos pertence, róubannolo día a día
os capitalistas, os empresarios e os seus representantes que, ademais, queren
que nos pelexemos entre nós para evitar que nos deamos conta de que a nosa
unión é a súa derrota.
Os e as comunistas pensamos que, para ter un
país para a clase obreira, un país que sexa verdadeiramente noso, fai falta dar
moitos pasos. Pero para dar grandes saltos primeiro hai que andar, hai que
empezar por algunha parte.
Os e as comunistas pensamos que, agora, o
esencial son tres cousas: recuperar a industria, defender os servizos públicos
e ter un país verdadeiramente soberano.
Estes tres obxectivos son necesarios,
ineludibles, pero deben ir acompañados necesariamente, do desenvolvemento do
poder obreiro. Porque nós non aspiramos a entregar o país a outros
capitalistas, a desenvolver outro capitalismo distinto, senón a terminar co
capitalismo. Queremos construír un país socialista, que é o único país que pode
ser da clase obreira.
Hoxe, xa, neste mesmo momento, propomos unha
serie de medidas para artellar a loita obreira e popular coa mirada posta no
derrocamento do capitalismo. Sabemos que non as aprobará o parlamento
capitalista, pero nós ímolas defender igual, na rúa e nas institucións. Son a nosa
guía de acción, a nosa proposta inmediata á nosa clase e ao noso pobo.
- Queremos
o pleno emprego e condicións de traballo dignas en todos os sectores.
- Queremos
unha industria que garanta a soberanía industrial e enerxética do país.
- Queremos
unha sanidade e unha educación universais, exclusivamente públicas e
gratuítas.
- Queremos
implantar unha rede de servizos sociais que cubra as necesidades de todos
e todas e sente as bases para a emancipación das mulleres.
- Queremos
que todo o mundo teña unha vivenda digna.
- Queremos
romper coa UE, a OTAN e o Euro.
- Queremos
unha relación de amizade e cooperación con todos os pobos do mundo.
Queremos
un país para a clase obreira. Acompáñasnos?
