O Partido Comunista dos Traballadores da Galiza chama
a todos os traballadores e traballadoras a mobilizarse o próximo 1º de Maio,
secundando masivamente as manifestacións convocadas polas centrais sindicais de
clase con motivo do Día Internacional dos Traballadores.
Vivimos tempos difíciles que demandan iniciar un novo
ciclo de loita
Tras varios anos de crise económica, os nosos dereitos
retrocederon gravemente. As sucesivas reformas laborais, aprobadas polos
gobernos do PSOE e do PP, co apoio doutros partidos capitalistas, supuxeron
unha grave deterioración das nosas condicións de vida e traballo. Ao mesmo
tempo que se manteñen altas taxas de paro, a capacidade adquisitiva dos nosos
salarios cada vez é menor. Unha gran parte dos traballadores e traballadoras do
Estado español atopámonos en risco de pobreza, mesmo cando temos un posto de
traballo.
Están a xeneralizarse os salarios de miseria ao mesmo
tempo que un pequeno puñado de familias continúa acumulando unha inmensa
cantidade de riqueza arrebatada á clase obreira. A riqueza acumúlase cada vez
en menos mans, mentres retroceden os dereitos sociais máis básicos, como o
ensino, a sanidade ou o dereito á xubilación.
Só saíron da crise os capitalistas, que xa preparan
unha nova ofensiva.
Con independencia de que partido ou coalición de
partidos capitalistas estea no Goberno, as nosas condicións de vida e traballo
continuarán empeorando. Porque tanto a xestión socialdemócrata como a liberal,
son formas de xestión capitalistas, formas de xestionar a nosa explotación
baixo os mandatos da Unión Europea, respondendo única e exclusivamente aos
intereses das grandes empresas.
Ademais, todos os indicadores económicos anuncian que
está incubándose unha nova crise capitalista na que tratarán de arrebatarnos os
poucos dereitos con que aínda contamos. Con esa intención, os grandes capitais apoiaron
o crecemento de forzas políticas de extrema dereita como Vox, que representa un
programa de máximos dos patróns e que, até a data, contou coa complicidade do
PSOE, tal e como comprobamos ao longo da última campaña electoral.
No capitalismo non hai saída para os traballadores e
traballadoras
Durante décadas o PSOE e o PP foron turnándose no
goberno, empeorando as nosas condicións de vida. Todos lexislaron na nosa
contra, todos nos arrebataron dereitos. Non temos o menor futuro no marco do
capitalismo, dun sistema que se basea, precisamente, na nosa explotación.
Debemos recuperar a nosa independencia política e
ideolóxica. Debemos levantar un programa político no que estean representados
os intereses da clase obreira e do conxunto dos traballadores e traballadoras.
Debemos loitar por un país para a clase obreira, por un país no que o poder
real estea nas nosas mans, por un país socialista-comunista. E iso pasa, en
primeiro lugar, por fortalecer a organización sindical e política da clase
obreira.
Organicémonos nos centros de traballo
O Partido Comunista chama aos traballadores e
traballadoras a defender o sindicalismo, afiliándose e participando masivamente
nos sindicatos de clase. Á patronal estórbanlle os nosos dereitos sindicais,
estórballe a nosa organización e, por iso, leva anos atacando aos sindicatos.
Debemos responder con urxencia defendendo os nosos dereitos sindicais, o
dereito á folga e a negociación colectiva. Só así seremos máis fortes, só así
poderemos frear a ofensiva da patronal e conquistar novos dereitos.
Pero a organización sindical non basta. A clase
obreira necesita a súa propia organización política. Os traballadores e
traballadoras necesitamos levantar de novo un gran Partido Comunista que estea
presente en todos os centros de traballo. Por iso, chamámoste a fortalecer as
filas do PCTG, a organizarte no Partido e levar a súa política ao teu centro de
traballo.
A clase obreira é internacional
Neste 1º de Maio, o Partido Comunista dos
Traballadores de Galiza, como parte do movemento comunista internacional, saúda
a loita da clase obreira de todos os países. Manifestamos o noso compromiso
internacionalista proletario coa loita que os nosos irmáns e irmás de clase
libran en todos os países e reafirmamos a nosa posición antiimperialista,
chamando a loitar contra os plans de militares da Unión Europea, contra a OTAN
e contra toda forma de agresión imperialista.
Vimos de lonxe, e chegaremos aínda máis lonxe co teu
apoio.
Viva a loita da clase obreira!
Viva o 1º de Maio!
Proletarios de todos os países, unídevos!