O Comité Central do Partido Comunista dos Pobos de
España, reunido en Madrid o 3 de marzo de 2019, a teor dos acordos adoptados no
XI Congreso Extraordinario celebrado en novembro de 2017
CONSIDERANDO
Que é un feito que existen dous partidos que vimos
utilizando a denominación PCPE na nosa actividade política diaria logo do V
Pleno do Comité Central que se celebrou os días 22 e 23 de abril de 2017.
Aquela reunión abriu un período no que existiron na práctica dúas organizacións
que actuaron baixo a mesma denominación e baixo os mesmos símbolos, pero con
órganos políticos e executivos distintos, con publicacións diferentes e con
persoas diferentes á fronte da Secretaría Xeral.
Que, ao longo destes case dous anos, puidemos comprobar
como esta situación de duplicidade foise convertendo, cada vez máis, nun
problema de primeira magnitude para o desenvolvemento do noso traballo
político, dado o risco de que se nos atribuísen erroneamente —como xa ten
pasado— posicións políticas e ideolóxicas que non compartimos e que son froito
do eclecticismo ideolóxico e das desviacións dos nosos antigos compañeiros de
filas, que xa foron denunciadas no seu momento pola maioría de células e
comités do PCPE, pola maioría dos Colectivos da Mocidade Comunista, por unha
Conferencia Central e por un Congreso Extraordinario
Que sempre sostivemos que era posible unha solución
política á crise no PCPE, sobre todo para evitar que fosen os tribunais
burgueses os que tivesen que decidir sobre o futuro do noso Partido.
Lamentablemente foron outros quen preferiron tratar de gañar a súa lexitimidade
nos tribunais mentres tapaban a súa incapacidade política baixo un manto de
insultos e ameazas que acabaron por cubrir de lodo e lama unha sigla con 35 anos
de historia.
Que, nas relacións internacionais, a existencia de dous
partidos denominados PCPE, membros ambos os dous do Encontro Internacional de
Partidos Comunistas e Obreiros, supón unha anomalía e unha dificultade engadida
ao traballo comunista neste campo, onde as relacións de cada partido deben
poder construírse e desenvolverse libremente, sen manobras nin confusións que
non benefician a ninguén.
Que o XX Encontro Internacional de Partidos Comunistas e
Obreiros, reunido en Atenas en novembro de 2018, adoptou o acordo de recoñecer
a existencia de dous PCPE, pero ao mesmo tempo solicitou que ambos os Partidos
tratásemos de resolver, sen lle xerar máis debates estériles ao Movemento
Comunista Internacional, a actual situación, incluíndo expresamente o cambio de
denominación dun dos dous partidos como vía de solución.
Que somos herdeiros da loita comunista que se vén desenvolvendo
en España desde a creación no noso país da primeira Sección Española da
Internacional Comunista. Do PCE de José Díaz e de Dolores, do PCOE de Líster
—que denunciou a traizón de Carrillo— e do PCPE —e das organizacións que se uniron
para crealo naquel Congreso de Unidade de 1984— que foi capaz de organizar en
todo o país os comunistas que resistiron como mellor puideron o eurocomunismo e
o posterior triunfo contrarrevolucionario na URSS e no resto do bloque
socialista europeo.
Que o XI Congreso (Extraordinario) do PCPE marcou un
punto de inflexión na loita comunista no noso país e abriu un novo tempo en
que, tras varias décadas de loita, se recupera a senda leninista en España.
Como diciamos entón, é o momento de recuperar o camiño sinalado pola Gran
Revolución Socialista de Outubro e de forxar o Partido que conduza a nosa clase
obreira ao poder.
Por todo isto, o Comité Central do PCPE, reunido de forma
extraordinaria en Madrid, sobre a base dos acordos do XI Congreso
(Extraordinario) do PCPE
ACORDA
Que, sen renunciar en ningún caso á loita pola sigla
PCPE, que sigue en marcha nos tribunais burgueses debido á porfía dalgúns dos nosos
antigos compañeiros de filas, a partir do día de hoxe, 3 de marzo de 2019, nada
máis cumprirse os cen anos da creación da Internacional Comunista, o noso
Partido pasa a denominarse Partido Comunista dos Traballadores de España
(PCTE), podendo adaptar a súa denominación á realidade lingüística e cultural
de Cataluña, Galiza e Euskadi, mantendo nas súas funcións todos os seus órganos
e responsables, mantendo como organización xuvenil os Colectivos da Mocidade
Comunista (CJC), o periódico Nuevo Rumbo, a revista Nuestra Política e a
participación na Iniciativa de Partidos Comunistas e Obreiros de Europa, na Revista
Comunista Internacional e nos Encontros Internacionais de Partidos Comunistas e
Obreiros.
Que se trasladará inmediatamente a presente resolución
aos Partidos Comunistas e Obreiros irmáns doutros países, tamén ás organizacións
políticas, sindicais, sociais e culturais coas que mantemos contacto, e que se
publicará nos medios do Partido para o seu coñecemento xeral.
En Madrid, o 3 de marzo de 2019