O mércores 27 de marzo foi publicada no BOE a
presentación das candidaturas do Partido Comunista dos Traballadores da Galiza
(PCTG) ao Congreso dos Deputados/Senado nas catro circunscricións electorais
galegas.
Tal como denunciabamos hai escasamente
dúas semanas, o Consello de Ministros novamente nos impuxo o requisito de
recoller un número de avais equivalente ao 1 por mil do censo de cada
circunscrición, tan só para facer posible a presentación das nosas candidaturas
ás Eleccións Xerais. Isto, que foi concebido como un atranco dirixido a impedir
a presentación das listas comunistas, foi correctamente entendido pola nosa
militancia e amigos/as como unha oportunidade de realizar, á ofensiva, o
traballo político de dar a coñecer a milleiros de traballadores e traballadoras
as candidaturas e o Programa comunista.
Durante estas dúas semanas de laborioso
esforzo militante nos centros de traballo e nos barrios populares, puidemos
comprobar que, sumados aos atrancos administrativos, tiñamos diante a poderosa
ofensiva ideolóxica da reacción anticomunista, altamente agudizada nestes
momentos de descomposición e crise económica e política do sistema capitalista
e os seus diversos xestores. E unha forte desconfianza cara á intervención
política claramente fundamentada na podremia do sistema e da falsa democracia
burguesa e a corrupción dos representantes políticos da burguesía. Desde hai décadas, chámense como se chamen,
levan gobernando e lexislando contra a maioría traballadora, coherentemente co
seu papel de administradores dos negocios das grandes empresas capitalistas.
Nesas difíciles circunstancias, grazas ao
esforzo e disciplina da militancia do Partido e a Mocidade Comunista, a axuda
de moitos amigos e amigas e o apoio de varios milleiros de traballadoras e
traballadores, fomos quen de acadar os avais necesarios para ofrecer, á clase
obreira e ao pobo traballador, a posibilidade -nas catro provincias galegas- de
votar comunista nas vindeiras Eleccións Xerais do 28 de Abril.
Dámosvos as grazas a quen confiastes en
nós e nos ofrecestes o voso aval, e chamámosvos a reforzar e apoiar a nosa
campaña.
Chamamos aos simpatizantes, amigos e
amigas que nos acompañastes nesta batalla gañada, a dar un paso máis adiante e
incorporarvos ás filas do Partido da Clase Obreira.