O Partido Comunista dos Traballadores da Galiza
(PCTG) chama a clase obreira e o conxunto do pobo traballador de Ferrolterra a
acudir á manifestación que sairá da Ponte das Cabras (Narón) en dirección ao Cantón
(Ferrol), este martes 12 de marzo ás 19:00 horas, para expresar a súa
solidariedade cos obreiros de POLIGAL, e rexeitar con eles o peche da factoría
por parte do Grupo Peralada.
O Grupo Peralada, con sede en Barcelona, conforma un
emporio empresarial multinacional constituído por casinos, hoteis, adegas,
campos de golf, supermercados, SICAVs, fondos de investimentos e diversas
industrias.
Os patróns levan desde 1991 recibindo millóns de
euros de axudas públicas na factoría de Narón, explotando os seus traballadores
e eludindo impostos por múltiples procedementos. Os beneficios acumulados aquí
neste tempo e as axudas públicas serviron para investir en novas fábricas,
primeiro en Portugal e desde 2016 en Polonia, procurando sempre salarios máis
baixos e novas axudas públicas en cada país. Agora, coa factoría de Polonia
traballando a pleno ritmo, desfanse da fábrica de Narón porque hai exceso de
produción no mercado. De quen se burlan?
A clase obreira e o pobo traballador de
Ferrolterra non deben consentir o peche de POLIGAL. Non se debe permitir que
siga a destrución da industria na Galiza. E moito menos nunha comarca tan
castigada polas mal chamadas “reconversións”, tan afectada polo desemprego e a
emigración da nosa mocidade.
Debemos esixir que se tomen as medidas necesarias
para manter POLIGAL aberta e producindo e garantir o futuro dos postos de
traballo.
Debemos reclamar a devolución das axudas públicas
recibidas polo Grupo Peralada e a expropiación dos seus donos.
Esiximos a NACIONALIZACIÓN DE POLIGAL, das
empresas da industria química e dos sectores económicos estratéxicos.
Defendendo o seu emprego, os traballadores de
POLIGAL defenden un futuro económico e produtivo na Nosa Terra.
TODOS E
TODAS AS TRABALLADORAS, A MANIFESTARSE O MARTES 12 DE MARZO ÁS 19:00 H. DESDE A
PONTE DAS CABRAS EN NARÓN
