Carta aberta ao Grupo Parlamentario Confederal de Unidos
Podemos.
O Goberno de Pedro Sánchez vén de recoñecer oficialmente o
golpista Juan Guaidó como Presidente da República Bolivariana de Venezuela,
cumprindo co guión da grave inxerencia imperialista que se desenvolve nese país
desde o pasado 23 de xaneiro e que pode desencadear unha confrontación civil e
militar de consecuencias imprevisibles.
O pasado 26 de xaneiro, o Buró Político do PCPE fixo
pública unha declaración chamando a que o recoñecemento ao golpismo venezolano
se convertese na tumba do Goberno de Pedro Sánchez. Logo da comparecencia do
Presidente do Goberno e o recoñecemento oficial do golpismo, o noso chamamento
cobra pleno sentido e convértese nunha urxencia.
O Goberno do PSOE non pode sosterse sen o apoio
parlamentario do Grupo Parlamentario Confederal de Unidos Podemos, integrado
por distintas forzas políticas entre as que se atopan Podemos, Izquierda Unida,
o PCE e as diferentes confluencias.
O Partido Comunista dos Pobos de España, nestes momentos
difíciles nos que se xoga a soberanía da República Bolivariana de Venezuela e a
paz, chama o Grupo Parlamentario de Unidos Podemos, e o conxunto de forzas e
partidos políticos que o compoñen, a retirar publicamente calquera apoio ao Goberno
do PSOE, abrindo unha crise parlamentaria que desemboque na convocatoria
inmediata de Eleccións Xerais en España.
A gravidade dos momentos que vivimos así o esixe. Non
cabe complicidade ningunha cun goberno imperialista que, cos seus propios
actos, atenta contra os máis esenciais principios do Dereito Internacional, e
sitúase en contra dos máis básicos dereitos dos traballadores e traballadoras e
das maiorías populares tanto venezolanas como españolas.
Expresamos de novo a nosa solidariedade incondicional co pobo
venezolano e chamamos á mobilización contra o Goberno español que, o mesmo que o
PSOE, confirmou, unha vez máis, o verdadeiro carácter de clase e imperialista
da socialdemocracia.
Ningún apoio ao Goberno español!
Venezuela será a tumba de Pedro Sánchez!
Buró Político do Partido Comunista dos Pobos de España.
Madrid, 4 de febreiro de 2019.
Fonte: PCPE
Traducido pola Revista Forxa