O Presidente do Goberno vén de anunciar en comparecencia pública a
convocatoria de Eleccións Xerais para o vindeiro día 28 de abril.
Para o Partido Comunista dos Pobos de España esta convocatoria representa
un novo fracaso da socialdemocracia, que logo da moción de censura aprobada o 1
de xuño de 2018 demostrou novamente a imposibilidade de xestionar o capitalismo
en beneficio dos traballadores e do pobo. Confirmouse que, tal como advertimos
tras o triunfo da moción de censura, a clase obreira non debe depositar ningunha
confianza na socialdemocracia. Por iso, chamamos no seu día a non dar nin un
minuto de tregua ao novo Goberno capitalista e a intensificar a loita obreira e
popular en todos os sectores.
O Goberno de Pedro Sánchez pasará á historia polas súas políticas de xestos,
polo incumprimento sistemático das súas promesas e pola súa posición
internacional imperialista, expresada con toda claridade no apoio prestado polo
Goberno do PSOE ao golpe de estado que se desenvolve en Venezuela.
Á vez, este novo e breve período de goberno socialdemócrata, veu confirmar a
bancarrota da nova socialdemocracia representada por Unidos Podemos e os seus
integrantes, que se demostraron incapaces de ofrecer unha alternativa para as
maiorías populares, supeditándose completamente á vella socialdemocracia.
O PCPE solicitoulle ao Grupo Parlamentario Confederal de Unidos Podemos a
retirada do apoio parlamentario ao PSOE, tras o seu apoio ao golpe de estado en
Venezuela, e esiximos a convocatoria de Eleccións Xerais. Entendiamos que se
trataba dunha esixencia de principios, compartida amplamente coa base social de
Unidos Podemos. No entanto, afastándose completamente de todo
internacionalismo, a nova socialdemocracia converteuse no único apoio do Goberno
imperialista no debate orzamentario e, ademais, gratuitamente, facéndose cómplice
da súa política.
Nas próximas eleccións as forzas capitalistas van tratar de atrapar a clase
obreira con falsos dilemas, situándoa ante a disxuntiva de apoiar a
socialdemocracia ou permitir o avance da dereita e a extrema dereita, ante a
disxuntiva de elixir entre unha e outra forma de xestión do capitalismo. Chamamos
os traballadores e traballadoras do noso país a non caer nesa vella e coñecida
trampa.
Os nosos intereses e o noso futuro non dependen de quen xestione a nosa
explotación, senón de poñer fin a toda forma de explotación e opresión. Por
tanto, o Partido Comunista anuncia a súa participación nas próximas Eleccións Xerais.
E faino co obxectivo prioritario de acumular forzas obreiras e populares nunha
liña de ruptura co capitalismo; co propósito de organizar o gran Partido
Comunista que necesita a nosa clase obreira e o noso pobo para poñer este país
ao seu servizo.
Por un país para a clase obreira!
Fonte: PCPE
Traducida pola Revista Forxa