Os acordos acadados polo Partido Popular e Ciudadanos para gobernar
Andalucía co apoio de Vox conteñen numerosas medidas que atacan as
traballadoras e traballadores andaluces. Destacan, entre outros, os ataques aos
dereitos das mulleres traballadoras e á loita contra a violencia machista. O
programa de Vox é o programa de máximos das grandes empresas no noso país e a
oligarquía séntese moi cómoda coas súas posicións. Malia as liortas do xogo
parlamentario, o novo goberno de PP e Ciudadanos realizará boa parte das
medidas de Vox.
En Andalucía, onde o PSOE agora se escandaliza despois de perder o Goberno
que ocupou durante décadas, non hai que esquecer que a Lei de Medidas de
Prevención e Protección Integral contra a Violencia de Xénero andaluza aprobada
este verán cos votos do PSOE, PP, Ciudadanos e Podemos non é máis ca un brinde
ao Sol xa que, se ben tipifica máis casos de violencia machista, non foi dotada
dun euro máis no orzamento con respecto á lei anterior.
As e os comunistas consideramos que os chamamentos a “Frontes democráticas
ou antifascistas” feitos por Podemos e IU, que pasan pola alianza co PSOE,
supoñen seguir aplicando as mesmas medidas que levaron ao auxe da extrema dereita.
A estes chamamentos a unha falsa unidade, o noso Partido responde chamando a
forxar a unidade da clase obreira contra o capitalismo, a reacción e todos os
seus defensores, fortalecendo os sindicatos de clase e a súa unidade na loita,
organizando política e sindicalmente a clase obreira migrante e a erguer un forte
Partido Comunista no noso país.
Comunistas da Galiza-PCPE e os CMC chamamos o conxunto da clase obreira a non lle dar nin un
minuto de respiro aos que aspiran a acabar cos nosos dereitos sociais, laborais
e democráticos. Chamamos a desenvolver a loita en cada empresa e en cada
sector, a mobilizarse nos barrios e nos centros de estudo contra toda medida
tendente a recortar os nosos dereitos. Nese sentido facemos un chamamento ás
organizacións sindicais a convocar Folga Xeral o vindeiro 8 de Marzo, e ao conxunto
da clase obreira a apoiar as mobilizacións que ese día se convoquen.
Por un país para a clase obreira!