Comunistas da Galiza-PCPE apoia e chama a
apoiar a mobilización nacional convocada pola CIG para o 26 de xaneiro en
Compostela en defensa do sistema público de pensións.
A nova reforma da xubilación aprobada en
decembro polo PSOE non reverte as medidas
regresivas das contrarreformas de 2011 e 2013, senón que lesiona gravemente o dereito de xubilación
parcial aos 61 anos, excluíndo a maioría de traballadores e traballadoras da
posibilidade de acollerse a este dereito.
Traizoando as súas propias promesas
preelectorais, pero consecuente coa súa traxectoria de impulsora das
contrarreformas laborais e do sistema de pensións, a socialdemocracia no
goberno, lonxe de derrogalas e restituír o dereito universal á xubilación
parcial anticipada aos 61 anos, deixa fóra deste dereito o 85% da clase
obreira. Reservan a posibilidade de acollerse a esta figura nada máis que aos
cadros de persoal das empresas manufactureiras, e dentro deles, só ao persoal
directamente ligado á produción.
Continuando coa súa política de xestos, o
goberno PSOE véndenos como restitución parcial aos traballadores/as dun dereito
arrebatado, o que non é máis ca unha manobra pactada cos monopolios da
automoción e as grandes empresas para abaratar os custos salariais descargando
parte deles na Seguridade Social e contratando mocidade máis barata que os
obreiros veteranos/as, no marco dos contratos “de relevo”.
“Mellorar a competitividade” e aumentar os
beneficios privados dos grandes monopolios son os verdadeiros obxectivos da
medida aprobada o 7 de decembro polo goberno capitalista.
Esta medida chove sobre mollado, sobre un
panorama de deterioro galopante dos nosos dereitos xubilatorios que vimos sufrindo desde as reformas de 2011
e 2013 do PSOE e do PP, tanto en materia de idade xubilatoria,
como de anos de cotización esixidos, fórmula de cálculo das contías e
desvinculación do IPC.
O desmantelamento do sistema público de
pensións e a privatización das mesmas afunde na miseria a quen cotizou toda a
vida, e a ampliación da idade xubilatoria condena a nosa mocidade ao paro e á
migración forzosa.
A defensa dos nosos dereitos
xubilatorios é unha loita de toda a
clase traballadora.
Cómpre erguer a fronte única da clase
obreira contra as medidas antiobreiras e antipopulares do novo goberno
capitalista que xa tivo 8 meses para amosar, unha vez máis, a quen serve.
Defendamos o sistema público de pensións,
unha conquista histórica da nosa clase, da loita sindical e da unidade obreira.
Respondamos con mobilización. Paremos o
retroceso dos nosos dereitos loitando.