Con motivo da visita oficial do Presidente do Goberno
Español a México, o Partido Comunista de México e o Partido Comunista dos Pobos
de España, unidos por unha fraternal relación baseada nos principios do
internacionalismo proletario, fan pública a presente declaración:
1. O imperialismo entrou nunha fase especialmente perigosa,
na que se incrementan todas as contradicións e aumenta o risco dunha confrontación
a escala mundial entre as distintas potencias e bloques imperialistas, en plena
disputa por un novo reparto do mundo. A visita do Presidente español a México e
a firma de varias declaracións conxuntas entre ambos os gobernos, encádrase
plenamente nesa disputa mundial, na cal tanto un goberno coma outro defenden os
intereses da burguesía.
2. Tanto o Goberno de López Obrador coma o de Pedro
Sánchez, son gobernos burgueses que practican unha xestión capitalista,
antiobreira e antipopular. Así o confirma o feito de que o Presidente Sánchez
viaxe acompañado dunha delegación composta exclusivamente por vinte e cinco
grandes empresas, que procuran estableceren novos pactos para favorecer a exportación
de capitais, o acceso aos recursos e a explotación da clase obreira; o mesmo
que os capitalistas mexicanos presentes en España. Entre ambos os países
existen evidentes relacións de interdependencia desigual de extraordinaria
importancia. O capital español ocupa o segundo lugar en investimentos en México
e o capital mexicano o quinto en España.
3. A colaboración entre ambos os gobernos non expresa os
intereses da clase obreira mexicana e española, nin representa os estreitos
vínculos fraternais que existen historicamente entre os nosos pobos. Trátase dunha
colaboración entre a burguesía española e a mexicana en contra dos
traballadores e traballadoras de ambos os países, representadas polos seus
gobernos capitalistas. Así o demostran os orzamentos presentados por ambos os
gobernos, nos que mentres se incumpren as principais promesas realizadas ao
pobo, manteñen as políticas de disciplina fiscal e estabilidade financeira
practicadas por anteriores gobernos e avanzan na militarización dos nosos
países. En España e México estáse confirmando, unha vez máis, o verdadeiro
carácter da vella e da nova socialdemocracia e o seu transcendental papel para a
pervivencia da explotación capitalista a costa da clase obreira.
4. A visita a México do Goberno español prodúcese tras un
intento de golpe de estado en Venezuela, no cal a reacción local está contando
co apoio directo de varios gobernos que, violando abertamente a soberanía e o principio
de non inxerencia, tratan de derrubar o Goberno da República Bolivariana de
Venezuela, recorrendo a unha presión multifacética contra a clase obreira e
contra a maior parte do pobo venezolano que resisten o golpe de estado e as inxerencias
externas.
O Presidente Pedro Sánchez, representando os intereses da
burguesía española en Venezuela e facendo de punta de lanza da Unión Europea do
capital e a guerra, trata de achegar posturas co Goberno de López Obrador recorrendo
ao pretexto do diálogo, mentres se libra unha guerra non declarada contra o pobo
venezolano e varios gobernos capitalistas están procedendo a incautar bens e
recursos no exterior que só pertencen ao pobo venezolano.
O Partido Comunista de México e o Partido Comunista dos Pobos
de España rexeitan frontalmente o golpe de estado en Venezuela, expresan a súa
solidariedade internacionalista coa clase obreira venezolana, co irmán Partido
Comunista de Venezuela (PCV) e coa Xuventude Comunista de Venezuela (JCV), e
facemos un chamamento á clase obreira dos nosos países para loitar contra as
inxerencias dos nosos gobernos en Venezuela e contribuír a derrotar o golpe de
estado.
Declaramos que, desde o noso punto de vista, os efectos
da crise capitalista en Venezuela, amplificados polo boicot da burguesía local e
polas medidas de agresión adoptadas por potencias estranxeiras, só poden ser
superados derrocando o capitalismo venezolano e construíndo un novo poder obreiro
e popular sobre a base da socialización dos principais medios de produción do
país, dando comezo á construción do socialismo-comunismo en Venezuela.
5. O PCPE e o PCM teñen unhas profundas relacións de
colaboración en todas as ordes, somos membros dos Encontros Internacionais de
Partidos Comunistas e Obreiros e formamos parte do Consello de Redacción da
Revista Comunista Internacional. As nosas estreitas relacións baséanse nos
principios do marxismo-leninismo e do internacionalismo proletario e en
compartir, xunto con moitos outros partidos comunistas e obreiros do mundo, unha
mesma estratexia revolucionaria dirixida á toma do poder político pola clase
obreira e á construción do socialismo-comunismo, en correspondencia coa época
que vivimos, que non é outra que a da transición do capitalismo ao socialismo, a
era das revolucións proletarias.
Saudamos a clase obreira mexicana e a española, que nestes
momentos libra loitas importantes en distintos sectores da produción, e facemos
un chamamento a fortalecer a organización sindical e política nos centros de traballo
para enfrontar con máis decisión e máis forza a explotación capitalista.
Chamamos os nosos pobos a rexeitar a colaboración e os pactos da burguesía
española e mexicana, dirixidos a incrementar a nosa explotación e a da clase
obreira doutros países, e a desenvolver unha estreita solidariedade proletaria,
conscientes de pertencer a unha mesma clase obreira mundial e de librar unha mesma
loita.
6. O Partido Comunista de México e o Partido Comunista
dos Pobos de España incrementarán a súa xa estreita colaboración revolucionaria
ante as decisivas loitas que están por vir. O futuro será socialista-comunista.
Fonte: PCPE
Traducido pola Revista Forxa