O Tribunal
Supremo acaba de decretar que son os clientes os que deben e deberán pagar o
imposto de Actos Xurídicos Documentados. A pesar de terse demostrado que son os
bancos os interesados en realizar a escritura e por tanto quen debería facerse
cargo do imposto, o alto tribunal español volve pórse ao lado da banca contra
os intereses de miles de familias. A argumentación foi que a decisión do 18 de
outubro tería un alto impacto económico na banca. O alto impacto aos miles de
familias endebedadas non lles importa.
Marx, na súa tese
sobre o Estado, dicía que “non é máis que a xunta que administra os negocios
comúns da clase burguesa”.
O Estado é por tanto un poder único na cúspide do
cal está a clase burguesa, a propietaria das grandes empresas. Fronte a esta
tese, os defensores do capitalismo dinnos que en realidade hai tres poderes
separados, dirixidos á fin e ao cabo pola vontade dos cidadáns expresada en
votos. O poder económico non existiría neste esquema, e o obreiro e o burgués
serían iguais ante as leis. Estas dúas teses son irreconciliables; unha é certa
e a outra é falsa. A decisión inaudita do Tribunal Supremo de paralizar unha
sentenza firme para remodelala a vontade da banca demóstranos moi claramente
cal das dúas teses é a correcta.
A acalorada
discusión no Supremo non foi entre quen defende aos grandes monopolios –todos
os membros do tribunal- ou á clase traballadora –ningún-, senón até que punto
creen que se pode tensar a corda defendendo os intereses da banca sen perder o
apoio maioritario da poboación no sistema político e xudicial.
O único
contrapeso que a burguesía ten á hora de defender os seus intereses é a
organización popular.
O eufemismo que
se usou estes días, “o medo a que o Tribunal Supremo perda a súa
credibilidade”, non é outra cousa que o medo a que a poboación deixe de crer
nas súas mentiras e entenda claramente cal é o papel do Estado. É, a final de
contas, o medo a perder o seu poder. Por tanto, a clase obreira e o pobo o que
deben facer é organizarse, renegar da suposta imparcialidade dos xuíces, deslexitimar
o seu poder, elevar a consciencia obreira e difundir as concepcións marxistas.
O PCPE non está
preocupado, como algunhas voces da socialdemocracia expresan, polo descrédito
da xustiza española senón todo o contrario, por como organizarnos para acabar
con ela e todo o poder burgués.
O PCPE chama a
todo o pobo traballador a secundar as mobilizacións que se vaian a realizar
estes días contra esta sentenza. Os dereitos do pobo traballador garántense
loitando por un país para a clase obreira.
Por un país para a clase obreira!
Buró Político do PCPE, 6 de novembro de 2018
Fonte: PCPE
Tradución: Revista Forxa