Ante o anuncio da multinacional norteamericana
ALCOA CORPORATION, de pechar as súas fábricas na Coruña e Avilés, o Comité
Nacional de Comunistas da Galiza-PCPE
quere manifestar o seu total rexeitamento a esta medida, a súa máis firme
solidariedade cos traballadores afectados e a súa exixencia da inmediata
nacionalización de todas as factorías de ALCOA, das empresas enerxéticas e dos
sectores económicos estratéxicos.
Desde a privatización da empresa INESPAL (mediante
a súa venda a ALCOA por 370 millóns de euros) en 1998 até o 2015, as factorías que hoxe se queren pechar
producíronlle á multinacional ianqui máis
de 1.400 millóns de euros de beneficios. Os sucesivos gobernos centrais e
autonómicos argallaron todo tipo de medidas subsidiando o custe da electricidade para ALCOA con arredor de mil
millóns de euros. Diñeiro público que ía directamente ao peto dos
accionistas da multinacional. Mentres, as factorías non recibían o adecuado
proceso de modernización e melloras técnicas que asegurase a súa
“competitividade”.
Unha vez máis, pretenden que a clase obreira, que
todo o produce co seu traballo, pague os pratos rotos do festín da gran burguesía,
do capital financeiro. Cando hai crise, temos que apertar o cinto. Cando xa non
hai crise, temos que apertar o cinto, tamén.
A clase obreira galega non debe consentir este
novo paso no proceso de desertización
industrial da Galiza. Hoxe están ameazados os case 400 postos de traballo
na factoría da Coruña e máis de 300 dos nosos irmáns asturianos. Non o
dubidemos, mañá, a infinita ansia de lucro do Capital xustificará tamén a
eliminación dos máis de mil empregos de San Cibrao (Lugo).
Mentres a clase obreira non tome o control do que
é seu, non haberá solución definitiva para os traballadores. Debemos, desde xa,
reclamar o que é noso, porque foi construído co noso traballo, para deixar de
ser vítimas dos caprichos do capital.
Esiximos a NACIONALIZACIÓN DE ALCOA, do sector
enerxético e de todos os sectores estratéxicos. A enerxía que emprega o sistema
produtivo, do que dependen o progreso e o desenvolvemento social, non pode
estar nas mans dos intereses do capital.
O Partido Comunista chama o conxunto da clase
obreira e do pobo traballador galego a defender a permanencia das industrias e
dos postos de traballo que deben asegurar un futuro económico e produtivo na
Nosa Terra.
Chamamos a prestar a máxima solidariedade á loita
dos traballadores e traballadoras das factorías de ALCOA que, defendendo o seu
emprego, defenden o noso porvir.
Chamamos a apoiar as mobilizacións e
manifestacións previstas nos días vindeiros para esixir: ALCOA NON SE PECHA!!
Todo para quen o produce! Todo para a clase
obreira!
ALCOA NON SE PECHA !!
A INDUSTRIA GALEGA NON SE PECHA !!
POLA NACIONALIZACIÓN DOS SECTORES ESTRATÉXICOS!!