Con setembro remataron moitos contratos temporais, ben coñecidos
pola súa precariedade. Pero non só nas empresas privadas, tamén nas
Administracións públicas. Con setembro rematan os prazos para que os concellos
liquiden algúns dos contratos que subvenciona a Xunta.
Estas contratacións temporais en masa, precarias de por si,
parecen ter unha única categoría: peón.
Poñamos un exemplo. No Concello de Cedeira, para
mantemento, hai un cadro de persoal fixo formado por: 1 xardineiro, 1 albanel,
1 pintor, 1 condutor, 1 electricista e 2 peóns interinos de xardinería e
electricidade; son 7 en total.
Dende xuño deste ano, contratáronse 6 peóns de mantemento
da bolsa de traballo. Logo sumáronse 2 peóns
e, por último, 5 peóns máis polo Programa de Integración Laboral. 13 en
total. Todos/as peóns. Como pode ser que un concello case triplique o seu cadro
de persoal de mantemento só con peóns? E non esquezamos que hai máis contratos
temporais, aparte dos de mantemento, que seguen sumando peóns, como son limpeza
de praias, etc.
Estes 5 últimos ían ser nun principio 4, cun contrato de
6 meses. No concello tardaron en facer os trámites e, con data límite de remate
de contratos, decidiron que serían 5 durante 5 meses. Ao final volvéuselles facer
tarde e tampouco chegarán aos 5 meses. Mala xestión que acaba pagando o
traballador ou a traballadora. Máis grave se cabe, se temos en conta que, para
optar a estes postos valórase o risco de exclusión social.
Tamén se ten en conta a idade para os postos. Traballadores
e traballadoras con décadas de experiencia aos que non se lles valoran os seus
coñecementos excepto, claro, á hora de asignarlles traballo. Entón si que se
teñen en conta os seus coñecementos e ignórase para que posto foran contratados
e contratadas.
Como pode ser que se realicen obras novas de recollida de
augas só con peóns? Como pode ser que se fagan impermeabilizacións de tellados
só con peóns? Como pode ser que se pavimenten novos camiños só con peóns? Pois
estas obras, e moitas máis, son as que se están a acometer por peóns, e só por
peóns, en boa parte dos concellos.
Todas e todos peóns. Esa categoría que dende a Xunta e os
concellos aliñados coa visión da patronal queren facer universal. Soldos baixos
para todo tipo de traballos.
Desde Comunistas da Galiza-PCPE denunciamos a falta de
obxectividade nas contratacións por parte dos concellos, na relación entre os
postos dos traballadores/as e os traballos a realizar. Non se debe pór confianza
nunha xestión dos Concellos que descoñece ou, peor aínda, despreza o valor da
experiencia e os coñecementos dos e das traballadoras.
O Partido Comunista considera que este modelo de
contratación precario, sen recoñecemento profesional nin das especialidades
laborais, constitúe un abuso, máis descarado se cabe, ao ser posta en práctica
polas institucións locais e os concellos aos que se lles presupón un mínimo
respecto polas condicións laborais en que os traballadores e traballadoras son
contratadas e prestan os seus servizos. A "superación" da crise capitalista
sen a contestación contundente por parte da clase obreira, está deixando un
escenario de explotación no que todo vale: os salarios de miseria, a
precariedade, a falta de profesionalidade....
Segue sendo máis necesaria ca nunca a organización e
a loita sindical e a toma de conciencia de clase para poder poñer punto final a
esta situación.
Por un traballo de calidade. Por un país para a clase
obreira!
Célula de Cedeira de Comunistas da Galiza-PCPE