Este 28 de setembro, o Partido Comunista chama as mulleres
traballadoras a saír á rúa defender os nosos dereitos.
Queremos exercer o dereito a unha saúde sexual e reprodutiva
sen restricións legais que converten servizo en beneficio, que converten o dereito
a interromper o embarazo nun privilexio para quen o pode pagar mentres aseguran
boas ganancias a médicos e clínicas privadas.
O aborto clandestino, cuxa primeira causa é o medo a
perder o traballo, é unha das principais causas de morte materna no noso país e
no mundo.
O dereito a abortar inscríbese nun contexto no que a
parcialidade e a contratación precaria que afecta particularmente ás mulleres
traballadoras, xerando unha profunda fenda salarial, débese en boa medida ao noso
papel como coidadoras nun estado capitalista onde as tarefas reprodutivas e de
coidados realizámolas as mulleres no ámbito privado e non remunerado das nosas
casas, mentres a patronal conculca calquera dereito de conciliación e
discrimina, acosa, marxina ou directamente despide as mulleres con fillos ao seu
cargo.
Chamamos as mulleres traballadoras a organizarse para loitar
cos seus compañeiros de clase polas súas reivindicacións baixo un Programa que
asegure o exercicio real dos seus dereitos sexuais e reprodutivos.
Polo acceso efectivo á educación sexual na escola, nos
centros de saúde e nos de planificación familiar. Por un tratamento da
sexualidade crítico coa ideoloxía patriarcal e coa mercantilización da
sexualidade, por unhas relacións sexuais libres e igualitarias.
Por unha información pública, adecuada e suficiente nos
barrios populares, con acceso libre e gratuíto aos métodos anticonceptivos e de
planificación, sen discriminación nin trabas administrativas, sen máis requisito
que a libre decisión da persoa interesada.
Polo dereito ao aborto libre e gratuíto na sanidade pública,
sen obxección de conciencia para o colectivo de profesionais, sen
discriminación por razón de idade ou nacionalidade, sen requisitos
administrativos, burocráticos ou familiares.
Polo arquivo dos procesos xudiciais abertos contra calquera
das persoas implicadas na interrupción do embarazo.
Pola despenalización total do aborto e garantías de
privacidade para as mulleres que exerzan este dereito.
Por un estado laico onde a relixión sexa unha actividade
privada, separada do ámbito institucional, do ensino e sen financiamento público.
Pola eliminación de toda publicidade sexista aberta ou
encuberta, con sancións económicas ou publicitarias ás compañías que as incumpran.
Este 28 de setembro, o Partido Comunista chama as traballadoras
e os traballadores a loitar pola despenalización do aborto e a inclusión da nosa
saúde sexual e reprodutiva na sanidade pública, como parte esencial do Programa
de loita das mulleres traballadoras e do conxunto da clase obreira.
Loitemos por un país para as traballadoras e os traballadores:
Por un país para a clase obreira!
