Desde o pasado 1 de
agosto, os axentes ambientais e forestais da Xunta de Galiza manteñen unha
folga indefinida para reclamar un acordo laboral que regule as súas condicións
de traballo. A resposta da Administración, como é propio de quen sirve os
intereses do Capital e dos seus negocios, foi decretar servizos mínimos
(máximos) e calumniar nos medios a xusta loita de quen arriscan a súa vida para
protexer o noso patrimonio natural.
Comunistas da
Galiza-PCPE e os Colectivos da Mocidade Comunista queremos manifestar a nosa
total solidariedade coa folga indefinida deste colectivo de traballadores e coa
súa loita por mellores condicións de traballo, que contribúa a unha eficaz
protección dos nosos montes e de todo o patrimonio ambiental de Galiza.
O noso país e outros
da contorna, como Portugal e Grecia, están a padecer desde hai anos
devastadoras destrucións, por lume e outras agresións, con ducias de vítimas
mortais. En todos os casos repítense escenarios semellantes. Especulación
financeira e inmobiliaria, intereses privados de grandes corporacións madeireiras,
abandono do mundo rural por causa da ruína do campesiñado provocada polas
políticas agrarias da Unión Europea, contan co beneplácito (e a planificación) de
todos os gobernos que se suceden uns tras outros. Á sombra do fume das
“catástrofes” ambientais, os gobernos van privatizando paseniño os servizos de
defensa do medio ambiente, axudando a florecer unha multitude crecente de
empresas privadas que converten en negocio lucrativo as destrucións nos
ecosistemas ou a súa protección. Simultaneamente, as condicións de traballo
empeoran, os perigos aumentan, e os salarios minguantes dependen cada vez máis
de vellas e novas tramas de caciques.
É tempo de dicir
basta!
Esixamos, xunto aos
axentes ambientais e forestais da Xunta de Galiza, un acordo laboral que
recolla as súas xustas reivindicacións.
Esixamos tamén o
rescate dos centos de traballadores brigadistas de SEAGA, que o vindeiro ano verán
desaparecer os seus empregos, e que se facilite a súa incorporación ao persoal
da Xunta, para que o país se beneficie da súa experiencia na loita contra os
lumes.
Loitemos, unindo as
loitas de todos os traballadores, por un
servizo público único de protección ambiental e forestal, que manteña lonxe
dos nosos montes as gadoupas de especuladores e capitalistas de todo tipo, que
pretenden facer cartos a conta da destrución e da espoliación do patrimonio
público.
Defendamos un
patrimonio natural ao servizo da clase obreira e do pobo traballador.
Por un país para a
clase obreira!
Comité Nacional de
Comunistas da Galiza-PCPE.
Comité Nacional dos
Colectivos da Mocidade Comunista-CMC