O Partido Comunista saúda o pobo traballador galego
neste 25 de xullo de 2018. Esta xornada é unha expresión do inequívoco carácter
nacional do pobo galego, que as e os comunistas defendemos fronte aos ataques aos
seus dereitos e liberdades políticas, á súa cultura e lingua, e fronte á
explotación da clase obreira e ao desmantelamento dos sectores produtivos
galegos. Nese sentido, reafirmamos o noso recoñecemento do dereito de
autodeterminación como o dereito democrático á libre separación e á formación
dun estado propio.
Estes intereses maniféstanse hoxe no terreo
práctico nunha serie de leis e de decretos, como os orzamentos, as reformas
laborais, a aprobación do teito de gasto e o resto de políticas e medidas
antiobreiras que foron apoiadas tamén por diversas forzas políticas
nacionalistas burguesas.
Estes intereses comúns da gran burguesía en España,
son a expresión do elevado grao de concentración e centralización do capital na
actual fase do Imperialismo. Reflicten a plena inserción dos monopolios e
transnacionais que operan desde as súas bases neste Estado, na pugna mundial
polo dominio dos mercados, dos recursos e polo abaratamento da man de obra que
lles garantan beneficios cada vez maiores.
Tanto ten se estas transnacionais operan desde
Arteixo, Carballo, Ourense, Madrid, Bilbo ou Barcelona. Precisan dun Estado forte
que garanta os seus intereses. Un Estado cada vez máis centralizado que,
contrariamente ás ilusións dalgunhas forzas políticas nacionalistas ou
reformistas, non camiña cara á súa fragmentación, senón cara a formas máis
autoritarias, policiais e uniformizadoras. Este é un proceso común a todos os
países capitalistas, onde as reformas antiobreiras avanzan en paralelo co auxe
político de forzas fascistas, identitarias ou relixiosas, mentres se fragmenta
a clase obreira e o pobo traballador con ilusións, enganos e falsos dilemas.
A brutal represión do goberno español contra os
dereitos nacionais de Cataluña, o 155, as sentenzas escandalosas como a dos 8
de Alsasua, centos de presos e exiliados políticos, as crecentes limitacións ás
liberdades “democráticas”, poden axudarnos a comprender que non se vence un
inimigo tan poderoso con forzas dispersas, fragmentadas e orientacións diverxentes.
O Partido Comunista aposta pola acumulación de
forzas na perspectiva do derrocamento do poder da burguesía e dos monopolios,
da ruptura das alianzas imperialistas e pola construción do socialismo-comunismo
como horizonte estratéxico no conxunto do Estado español.
É preciso erguer a forza unificada da clase obreira
toda, contra o Estado da oligarquía. Non hai atallos que nos libren da
necesidade de construír o seu Partido Comunista. A construción socialista será
quen de garantir a liberdade, a soberanía e a independencia dos pobos. A
liberación nacional de Galiza virá do triunfo da clase obreira e do socialismo.
Galiza será ceibe cando a clase obreira teña o poder.
POLO
PODER OBREIRO!
POLO
SOCIALISMO-COMUNISMO!
POR
UN PAÍS PARA A CLASE OBREIRA!
Comité
Nacional
Comunistas
da Galiza-PCPE
22
de xullo de 2018