En primeiro lugar temos que sinalar que nestas últimas semanas os
traballadores e traballadoras de DAMA OURENSE SL (franquicia de McDonald’s)
están de noraboa posto que conseguiron a maioría de delegados sindicais por
parte da CIG, dende o Partido Comunista mandamos o conxunto da plantilla unha
fraternal aperta e as nosas felicitacións, xa que non nos cabe dúbida de que os
delegados sindicais escollidos non permitirán nin un só ataque aos traballadores
e que defenderán os seus intereses sempre desde unha posición clasista e serán
un muro de resistencia infranqueábel para a patronal e os seus lacaios.
En segundo lugar temos que informar ao conxunto das clases traballadoras de
todo Ourense que estas eleccións sindicais son a decisión que toman os traballadores
para defenderse dos múltiples ataques cara toda a plantilla producidas en DAMA
OURENSE por parte do empresario Esteban Cuesta Martín (único administrador de
DAMA OURENSE). Tal e como veñen denunciando os propios traballadores conviven
diariamente con presións, ameazas, coaccións, provocacións…[1]
e cunhas eleccións sindicais que, por suposto, o empresario tratou de boicotear
e malograr, pero que non chegou a conseguir.
Esta situación é froito do conflito de intereses de clase que se produce
dentro da empresa, o cal leva ao empresario a intentar evitar que exista unha
posición independente dentro da clase traballadora que se preocupe por defender
os intereses das propias traballadoras e que os empresarios non poidan exercer
a súa explotación con total impunidade, os intereses de clase son irreconciliábeis.
Fronte a isto, os traballadores xa están comezando a tomar medidas dende o
minuto un no que comezaron a organizarse. Só desde a loita e a organización
poden acadarse vitorias, a unidade é a nosa principal arma. A clase obreira
debemos artellar mecanismos de solidariedade entre o conxunto de todos os
traballadores e traballadoras que nos permitan plantarlle cara aos ataques
constantes dos empresarios ou da patronal no seu conxunto, e os traballadores
de DAMA OURENSE, coma outros tantos no conxunto do estado están comezando a
marcarnos o camiño.
Os traballadores de DAMA OURENSE son exemplo de coraxe de clase e contan
con todo o apoio do noso Partido e por iso pedimos tamén o apoio do conxunto da
clase obreira de Ourense e a difusión deste conflito, para que a patronal saiba,
que ningún traballador ou traballadora está soa na loita. Por último expresar
tamén a nosa solidariedade cos familiares dos e das traballadoras. A avaricia e
o egoísmo dunha soa persoa conleva o sufrimento de moitas, iso é o capitalismo.
Solidariedades cos traballadores e traballadoras represaliadas!
Adiante a loita da clase obreira!
Nin un paso atrás!