O Partido Comunista dos Pobos de España segue con atención
os acontecementos que se suceden no país, onde está en marcha un proceso
de reorganización do sistema político burgués no marco do cal deben ser
analizados os importantes acontecementos dos últimos días e a moción de censura
anunciada polo PSOE.
A detención de Eduardo Zaplana e doutras persoas vencelladas
política e empresarialmente co Partido Popular do País Valenciano, acusados de
branqueo de capitais procedentes do cobro ilegal de comisións pola adxudicación
de obras públicas, pon de novo en evidencia o entramado organizado no seu día arredor
da construción e a obra pública, no cal sectores patronais e políticos a soldo
utilizaron o noso solo e o noso patrimonio medioambiental para lucrarse a costa
da destrución do país, do diñeiro público e do padecemento do pobo.
Á vez, a aprobación dos Orzamentos Xerais do Estado para o
exercicio 2018, co apoio de Cidadáns, PNV, Coalición Canaria, Unión do Pobo
Navarro, Nova Canarias e Foro Asturias, permite que a burguesía conte coa
estabilidade necesaria para continuar incrementando os seus beneficios,
saqueando o país e intensificando a explotación e o sufrimento das maiorías
populares.
As forzas políticas burguesas que apoiaron os Orzamentos do
Goberno do Partido Popular representan distintos sectores da burguesía que,
defendendo os intereses dunha mesma clase social, demostran a súa capacidade
para repartirse o orzamento público por riba de diferenzas puntuais. O caso do
PNV, sostendo os Orzamentos, co artigo 155 da Constitución vixente en Cataluña,
é o mellor exemplo de que a política burguesa se move en todo momento polos
intereses económicos da clase social á que sirve.
A publicación da Sentenza Nº 20/2018 da Audiencia Nacional,
no coñecido como caso Gürtel, confirmando o que o pobo coñecía sobradamente,
actúa como combustible para un cambio nas formas de dominación que leva desenvolvéndose
hai tempo, situando o Goberno de Mariano Rajoy nunha posición de debilidade e
acentuando a grave crise do Partido Popular. Mais dáse a coñecer tras a
aprobación dos Orzamentos Xerais, facilitando así a súa aprobación e que os
cambios no marco político se leven a cabo mantendo intactos os intereses
económicos da burguesía.
As últimas enquisas publicadas confirman que, tal e como vén
sostendo o noso Partido desde hai tempo, o vello bipartidismo foi substituído
por un eixe na dereita (representado polo PP e Cidadáns) e por un eixe na esquerda
(representado polo PSOE e Podemos), existindo unha intensa disputa no seo de
cada un deles para determinar que forza é hexemónica e tamén entre ambos os eixes,
sen descartar outras posibilidades transaccionais entre ambos os polos como a
que puidese representar un acordo entre PSOE e Cidadáns. Estes cambios, ao mesmo
tempo que permiten atrapar o pobo traballador en falsos debates, dotan o
sistema político dunha enorme flexibilidade para afrontar as novas convulsións
económicas e sociais que están por vir. Os dous eixes políticos sobre os que se
articula o debate parlamentario discrepan nos matices, nas formas de xestión, mais
están ferreamente unidos na defensa do capitalismo, na defensa da explotación
que sofren a clase obreira e as grandes maiorías populares.
A cuestión esencial a resolver non é se o capitalismo é
xestionado por un ou outro polo, senón se o sistema capitalista debe ou non ser
superado. A disputa parlamentaria entre forzas defensoras do sistema burgués non
resolverá ningún dos nosos problemas. Con independencia do resultado da moción
de censura anunciada polo PSOE ou das forzas que a poidan apoiar, a explotación
continuará e intensificarase, xa que nos laboratorios da clase dominante prepáranse
novas medidas antiobreiras e antipopulares para que unha ínfima minoría continúe
acumulando riquezas a costa do noso traballo e do noso sufrimento.
A intensificación da loita obreira dos últimos meses debe
continuar, pois é o único camiño seguro para defender os nosos dereitos e para a
conquista de novas posicións. Só a loita independente dos traballadores e
traballadoras no organizativo, no político e no ideolóxico dará resultados. Ninguén
debe deixarse arrastrar polas forzas burguesas, ninguén debe loitar baixo bandeiras
alleas.
Chamamos a intensificar a loita sindical na perspectiva da Folga
Xeral, con independencia do que poida suceder no marco parlamentario e de quen
represente o poder dos capitalistas. Chamamos os traballadores e as traballadoras
a soster masivamente as convocatorias sindicais e dotalas de contundencia e perspectiva
política.
Chamamos a politizar todas as loitas, a fortalecer as
posicións da clase obreira, á organización combativa da clase obreira nos
sindicatos e no Partido Comunista. Non é tempo de conciliación, senón de
intensificar a loita de clases ante os acontecementos que están por vir.
Por un país para a clase obreira!
Buró Político do PCPE.
25 de maio de 2018.
Tradución: Revista FORXA