Logo dunha consulta do TSX de Cataluña sobre a protección da muller embarazada no caso de despedimentos colectivos, o Tribunal de Xustiza da UE respondeu consagrando a liberdade de despedir incluso as mulleres embarazadas, no marco dos despedimentos colectivos.
A Unión Europea e o seu aparato de xustiza téñennos afeitos a un estilo de arbitraxe ambiguo e enganoso, no cal, a letra pequena desmente a demagoxia hipócrita dos grandes titulares. Por exemplo, cando o TXUE tira das orellas a un estado membro, polo seu alto índice de precariedade e temporalidade no emprego público, tárdase algún tempo en entender se está formulando a necesidade de estabilizar a situación laboral dos empregados públicos ou está propoñendo, como vía para eliminar a temporalidade, o despedimento dos traballadores e traballadoras temporais.
Neste caso, o TXUE considerou que o despedimento de embarazadas no marco dos despedimentos colectivos será procedente, sempre e cando, a decisión extintiva se tome por motivos non relacionados co embarazo ou co exercicio do dereito aos permisos derivados deste. Isto implica que, se o empresario pode probar que o despedimento non foi por causas relacionadas co embarazo ou co resto de permisos relacionados co mesmo, o despedimento sería procedente.
Unha vez máis, revélase a natureza antiobreira da UE, e afóndase na súa barbarie antisocial, pois ben se sabe que hoxe, o máis sinxelo para un empresario, é xustificar con calquera argumento o despido dunha traballadora. Sobre todo despois das últimas reformas laborais.
Fonte: Novo Rumbo #8