“Sostibilidade”,
“factor de revalorización”, “velocidade de axuste” e outros tantos eufemismos
para non nos dicir que nos queren aumentar a taxa de explotación mediante a
baixada substancial das pensións e preméndonos para que contratemos plans
privados de xubilación, reducindo así, aínda máis, os nosos minguados salarios.
Dá igual a cor
do partido que xestione o goberno da patronal: azul, laranxa, morada ou pseudo-vermella.
O goberno segue a liña trazada pola Unión Europea sen se desviar nin un ápice.
Coas reformas de 2011 e 2013, PSOE e PP marcaron un camiño claro para a
ampliación da idade de xubilación, o aumento dos anos de cotización e a
consolidación de fórmulas de cálculo das contías, segundo varios parámetros
modificábeis anualmente en función dos intereses dos capitalistas. Os grandes
empresarios refregan as mans diante desas medidas, mentres a clase obreira padecemos
o seu parasitismo nas nosas carnes.
É hora de erguer
unha fronte común da clase obreira e as capas populares para confrontar as
medidas reaccionarias e antipopulares do goberno da patronal. A loita histórica
polas pensións trouxo importantes conquistas ao longo do século XX, que agora nos
queren arrebatar. A loita obreira neste século non debe caer en falsos dilemas.
Ningún goberno capitalista nos regalará unha xubilación digna e en paz. Só loitando
de forma organizada sobre a base dos nosos intereses de clase, poderemos
garantir os nosos dereitos.
Contra os
gobernos da patronal e a Unión Europea!