Tras os
acontecementos do día de hoxe, o PCPE mostra a súa preocupación polo aumento da
escalada represiva no conflito catalán. Hoxe volveuse comprobar a natureza
ditatorial do Estado, elemento que as e os comunistas denunciamos sempre e
sobre o que alertamos especialmente nas últimas semanas.
O PCPE
pronunciouse con claridade sobre a base política do conflito catalán e as
propostas que a clase obreira necesita para saír das falsas dicotomías en que
os nacionalismos a pretenden atrapar. Dixemos que a folla de ruta do
independentismo non é útil para conseguir a autodeterminación de Cataluña. Pero
á vez que tratamos que a clase obreira escolla o seu propio camiño, creemos que
todas aquelas e aqueles cataláns que querían hoxe expresarse mediante o voto
tiñan dereito a facelo sen ter que facer fronte a cargas policiais. As accións
do Estado encamiñadas a impedir a votación, especialmente as de carácter
policial, teñen todo o noso rexeitamento.
O PCPE expresa a
súa preocupación polo auxe dos nacionalismos. Cando a clase obreira, en virtude
da defensa da patria, dá un cheque en branco ao seu goberno para enfrontarse á
clase obreira doutras nacións, está a ser derrotada. A defensa da patria debe
ser sempre a defensa dos intereses da súa clase obreira, intereses sempre
confluíntes cos de toda a clase obreira internacional.
Secretariado
Político do PCPE | 1 de outubro, 2017