Comunistas da Galiza-PCPE
chama ao conxunto dos traballadores e traballadoras a apoiar as mobilizacións
sindicais en marcha pola defensa do sistema público de pensións.
As sucesivas
contrarreformas impostas polos gobernos inimigos da clase obreira, tanto
liberais como socialdemócratas, supuxeron un ataque continuado contra os
dereitos dos traballadores baseado na suposta “insostenibilidade” do sistema
público de pensións.
Os duros recortes
planificados polos gobernos dos monopolios apuntan ao desmantelamento do
sistema público de pensións, preparando a súa privatización e a súa
transformación nun novo espazo para a acumulación de capital. O obxectivo
destas medidas é o saqueo da caixa da Seguridade Social, de todo o aportado
polas clases traballadoras ao longo de vidas enteiras entregadas ao traballo.
Para favorecer os
seus plans privados, arroxan á miseria a quen cotizou toda a vida , á inmensa
maioría que non ten con que pagarse un plan privado ou un concerto coa
Seguridade Social e aos milleiros de familias que, carecendo dun posto de
traballo e/ou dun teito, dependen dos seus maiores para sobrevivir.
Respondamos con
mobilización. Paremos o retroceso dos nosos dereitos mediante a loita.
Defendamos o
sistema público de pensións, unha conquista histórica da nosa clase, da loita
sindical e da unidade obreira.
Por unhas pensións dignas para quen traballou toda a vida!
Por un país para a clase obreira!