Do 14 ao 22 de
outubro celebrarase en Sochi (Rusia) o
decimonoveno Festival Mundial da Mocidade e os Estudantes (FMJE). O ano 2017
foi escollido como data simbólica na que se cumpren 100 anos desa Revolución
que estremeceu ao mundo e 50 anos do tráxico (e covarde devandito sexa de paso)
asasinato do heroico guerrilleiro Che Guevara. Ademais, esta edición servirá
tamén para honrar ao recentemente falecido Mohamed Abdelaziz, incansábel loitador
polos dereitos do pobo saharaui.
Con todo, o XIX
FMJE non só se centrará en homenaxear a importantes personalidades ou
influentes feitos históricos, senón que tamén será un espazo de debate,
intercambio e aprendizaxe político, ideolóxico, cultural, onde tamén terá
cabida o deporte, a arte, a música e a cultura en xeral.
Noutros artigos e
publicacións xa abordamos os contidos concretos deste Festival, os propósitos
que os CMC nos marcamos, así como un breve esbozo histórico do xurdimento e
desenvolvemento do movemento dos Festivais. Por esta razón, trataremos de
centrar a atención no proceso preparatorio, en específico o que se está a
realizar no noso país.
Seguindo as
orientacións que se acordaron nas reunións preparativas internacionais, hai uns
meses constituíronse: primeiro, o Comité Preparatorio a nivel estatal (como
dirección dos preparativos en todo o país) e posteriormente Comités
Preparatorios a nivel local.
Estes Comités
están compostos polas organizacións que son membros da Federación Mundial da
Mocidade Democrática (FMJD), que é a organización que convoca o Festival, así
como outras organizacións que, sen ser membro foron convidadas por cumprir un
papel destacado na loita polos dereitos da mocidade traballadora e estudante no
noso país.
Na actualidade,
son diversas as actividades que están a pór en marcha os distintos Comités
Preparatorios: charlas, concertos, actividades culturais, e un longo etcétera
coa finalidade de promocionar o Festival e concienciar da necesaria loita
obreira e popular, de carácter anti-imperialista ao conxunto da mocidade.
Igualmente estas iniciativas servirán para cubrir algúns gastos loxísticos
relativos ao Festival, para o que tamén se están editando algúns materiais e
unha campaña de crowdfunding.
Se estás interesado no movemento dos Festivais e na loita anti-imperialista, non dubides en colaborar nas actividades máis próximas á túa cidade!
Fonte: Novo Rumbo Xullo 2017