Ante o atentado ocorrido
onte en Barcelona, o Secretariado Político do PCPE quere expresar a súa máis
firme condena do mesmo e a súa plena solidariedade coas vítimas, os seus
familiares e co conxunto do pobo de Barcelona que se viu afectado por este acto
terrorista.
Atentados coma o de
onte, pero tamén os recentes de Londres, París, Niza ou Berlín, non son actos
illados, senón que se enmarcan nunha moi concreta situación internacional na
que as vítimas sempre son os traballadores e os pobos.
O Estado Islámico, que
reivindicou o atentado, é unha creación das potencias imperialistas
occidentais. Tanto Estados Unidos como a Unión Europea teñen financiado,
lexitimado e armado a ese grupo para convertelo nun factor desestabilizador en
Oriente Medio, aliado dos seus propios intereses xeoestratéxicos.
Os Gobernos españois
foron parte activa destas manobras, chegando a apoiar a entrega de armas a
grupos terroristas de Siria, intervindo militarmente en Iraq, Siria e
Afganistán e cedendo a nosa terra, o noso mar e o noso aire para facilitar
agresións e inxerencias en Asia e África.
Sabemos perfectamente
quen son os cómplices do ocorrido onte en Barcelona. Tanto o Goberno como a
Casa Real son firmes aliados de quen directamente apoia e financia o terrorismo
yihadista, como Arabia Saudita e o resto das monarquías do Golfo. Ao mesmo
tempo, son quen alenta e difunde o terrorismo en países como Venezuela.
En momentos como este
non caben posicións ambiguas. É necesario marcar unha clara liña divisoria
entre quen fomenta as guerras e quen as padece.
Dun lado, quen apoia e
participa nas guerras imperialistas, quen fomenta o terrorismo e se beneficia
do saqueo e espolio de países enteiros para logo manter en condicións inhumanas
aos refuxiados nos CIEs ou nas fronteiras de Ceuta e Melilla.
Doutro lado, a clase
obreira e o pobo traballador, que expresaron de forma contundente a súa
solidariedade a través de múltiples vías, pero sobre todo por medio do persoal
sanitario -que traballou toda a noite para atender as masivas doazóns de
sangue-, dos taxistas -que ofreceron transporte gratuíto a quen o necesitase
durante as horas posteriores ao atentado- ou do persoal de Eulen que, a pesar
dos ataques mediáticos que vén sufrindo pola súa loita contra a empresa e o
Goberno, suspendeu temporalmente a súa folga indefinida.
Nos próximos días imos
ter que enfrontar episodios de manipulación política e intentos de colocar á
maioría da clase obreira e do pobo traballador tras bandeiras alleas con fins
antidemocráticos, antiobreros e represivos. Imos ter que enfrontar unha campaña
de xenofobia e racismo contra a poboación árabe e/ou musulmá.
Por iso, o PCPE fai o
seguinte chamamento:
- Incrementemos a loita contra o imperialismo e as súas guerras. Debemos denunciar aos culpábeis destes ataques e aos seus cómplices que favorecen, coas súas agresións e as súas alianzas en terceiros países, o desenvolvemento de organizacións asasinas como o Estado Islámico.
- Loitemos decididamente contra o racismo, a xenofobia e toda forma de reacción, desenvolvendo amplamente a solidariedade coa poboación árabe e/ou musulmá que vive en España.
Nin terra nin mar nin
aire para os imperialistas e os seus grupos terroristas!
Solidariedade internacionalista
e de clase fronte á reacción!
Madrid, 18 de agosto de 2017
Secretariado Político do PCPE