Os comunistas queremos
manifestar o noso apoio á folga de 3 días na factoría de Alcoa, na Coruña, diante
do bloqueo da negociación colectiva por parte da empresa.
Os traballadores enfróntanse
a un xigante, a un monopolio estadounidense do aluminio que conta con máis de
60.000 traballadores repartidos en 30 países, a unha multinacional con vendas
de máis de 23.000 millóns de dólares ao ano e unha capitalización bursátil de
máis de 12.000 millóns de dólares. Un dos tres maiores grupos industriais do
sector do aluminio do mundo.
O ano pasado Alcoa
anunciou que encargará a Goldman Sachs a venda das súas plantas en Galiza e
Asturies ou abrirá o camiño á incorporación de novos socios tales como axencias
de inversións ou empresas fortemente ligadas ao sector financeiro, situación
que pon en perigo os postos de traballo e o futuro da industria en si mesma.
Nesta ocasión, a
dirección de Alcoa leva máis dun ano e medio dilatando a sinatura dun acordo
que afecta as condicións laborais de 370 persoas e que vincula o convenio ao
sistema de poxa eléctrica.
Hai que lembrar que esta
industria estratéxica ten a súa orixe na empresa pública INESPAL, comprada por
Alcoa en 1998 por a penas 410 millóns de dólares, ademais de beneficiarse de
subvencións millonarias e compromisos de manter o prezo da enerxía en caso de
que se vira incrementada.
Comunistas da
Galiza-PCPE e os Colectivos da Mocidade Comunista (CMC) apostamos pola
renacionalización porque pensamos que este é o único xeito de garantir un
futuro estábel e definitivo para este sector. O futuro dos nosos empregos non
pode depender nin sustentarse nos privilexios e a chantaxe deste histórico
monopolio que naceu co nome de Aluminum Co. of America.
POR UN CONVENIO DIGNO!
OS NOSOS DEREITOS DEFÉNDENSE
LOITANDO!