ADIANTE A XUSTA LOITA DOS TRABALLADORES/AS DO SECTOR DE
AMBULANCIAS
Comunistas da Galiza-PCPE
e os Colectivos da Mocidade Comunista-CMC saudamos a loita dos traballadores e traballadoras
do sector do transporte sanitario en defensa do seu convenio colectivo.
Xa hai anos que o noso
Partido manifestou o seu apoio á loita deste colectivo de traballadores, que
convenio tras convenio loitan por impedir que unha patronal especialmente
usureira co apoio dunha administración autonómica cómplice, non só empeoren e
rebaixen as súas condicións salariais e de traballo senón que tamén degraden a
prestación do servizo para todo o pobo.
Conseguir un convenio
colectivo galego xusto, un salario digno, eliminar o abuso das horas extras e
poder traballar con seguridade evitando os riscos na prestación do
servizo, son razóns suficientemente
importantes e xustas como para que mereza a pena loitar e gañar a batalla.
Despois de 8 anos dunha
crise capitalista insuperábel, podemos comprobar non só a inutilidade das
medidas políticas da dereita tratando de cargar sobre as nosas costas o prezo
da descomposición do seu sistema caduco e fracasado, senón tamén o engano de
aquelas outras propostas socialdemócratas (vellas e novas) que tratan de
vendernos fume afirmando que eles poden solucionar o problema do paro, da
miseria dos salarios, das privatizacións... sen saír do capitalismo...
As e os Comunistas
levamos tempo afirmando que unicamente a loita unida de toda a clase obreira,
os sectores populares e a xuventude, que sofren as penalidades da explotación e
da crise do capital, pode evitar que cada ano que pase as nosas condicións de
vida e de traballo empeoren e se degraden máis aínda. A loita dos traballadores
e traballadoras do transporte sanitario constitúe un exemplo de loita que toda
a clase obreira está interesada en gañar, porque demostrará que a loita firme é
o camiño e o método, para facer avanzar as nosas posicións de clase e os nosos
dereitos.
VIVA A UNIDADE E A LOITA DA CLASE
OBREIRA!
Foto: Comunistas da Galiza-PCPE, Ferrol, 1/12/2016