A chamada
"pobreza enerxética" é pobreza, a secas. Pobreza dos máis para
enriquecer aos menos, que cada pouco se cobra novas vítimas mortais e que non
ten amaño duradeiro e definitivo nas actuais coordenadas fixadas polo Poder das
grandes empresas monopolistas.
É importante
coñecer e esixir o cumprimento da normativa, da lexislación española e europea
onde se protexen os dereitos da clase traballadora usuaria. Pero estariamos
cometendo un grave erro ou deliberadamente ocultando a realidade se
analizásemos esta problemática exclusivamente en clave de maior transparencia,
doutro "modelo enerxético" ou esmolas aos "menos
favorecidos".
A regulación polo goberno dunha tarifa eléctrica menos leonina é unha demanda xusta, mais esquece un factor fundamental. É a clase capitalista quen lexisla e goberna a través dos seus representantes e xestores políticos. O Estado representa os intereses das grandes empresas, lexisla a favor dos seu beneficios e é o garante do seu proceso de acumulación.
O terrible non é
que unha compañía non cumpra co seu deber de informar de que vai cortar a luz a
unha familia sen recursos, o terrible é que un xigante empresarial que embolsa beneficios
de miles de millóns de euros, amparándose na Lei burguesa negue un subministro básico
de supervivencia ás familias, que son as que xeran eses beneficios co seu
traballo e consumo como parte dun mercado cautivo que non ten máis opción que
contratar os seus servizos, ou morrer de frío ou nun incendio accidental.
O que estamos a
vivir, e a morrer, son as consecuencias dun proceso privatizador que supuxo
concentrar e centralizar o capital en cada vez menos mans, transformar os monopolios
públicos en monopolios privados, transformar en mercadoría os servizos básicos
de primeira necesidade, encarecelos, negarnos o acceso a eles. Un proceso que
foi e vai acompañado de deterioro do servizo, despedimentos en masa dos seus
traballadores e destrución dos dereitos e condicións laborais.
O que estamos a
vivir, e a morrer, é o capitalismo na súa fase máis agresiva e depredadora.
Só garantiremos
os nosos dereitos, como parte da nosa loita pola expropiación dos expropiadores,
no marco dunha economía planificada que teña como centro as necesidades sociais
e non os beneficios das grandes empresas privadas.
NON AOS CORTES DE
SUBMINISTRO ELÉCTRICO ÁS FAMILIAS TRABALLADORAS!
Comunistas da Galiza-PCPE
Colectivos da Mocidade Comunista (CMC)