[Comunicado de urxencia do Comité de Asturies do PCPE]
No día de hoxe, a vila de Cerredo amenceu ocupada miltarmente por máis de
cen efectivos antidisturbios (GRS) da Garda Civil. A súa misión é protexer ao
monopolista Victorino Alonso para que saquee impunemente a mina e retire, ao
seu pracer, toda a maquinaria que desexe. O temor a que os mineiros impedisen o
espolio que supón a retirada desa maquinaria fixo que o Estado, unha vez máis,
demostre que está ao servizo dos grandes empresarios e en contra da maioría
social, da clase obreira e a vila.
Ao longo do día, estanse sucedendo os actos de intimidación á poboación de
Cerredo, impedindo incluso o acceso á mina dos membros do Comité de Empresa.
Queren sementar o medo nun cadro de persoal e nunha vila que está en loita,
pero non o conseguirán. Os concelleiros do PCPE o Concello de Degaña -ámbolos
dous mineiros- xunto a outros concelleiros da Corporación Municipal, iniciaron
un peche no Concello esixindo a inmediata retirada da Garda Civil. O Comité de
Asturies do Partido chama a toda a clase obreira asturiana a manifestar a súa
solidariedade, por todos os medios ao seu alcance, cos mineiros en loita e co
peche.
Se nas próximas horas non se pon fin á ocupación militar de Cerredo por
parte da Garda Civil, o PCPE resérvase o dereito a iniciar todo tipo de
contactos para chamar ao conxunto dos traballadores mineiros de Asturies e
León, e a todo o movemento obreiro, a marchar sobre Cerredo en solidariedade
cos nosos irmáns de clase.
Responsabilizamos ao Delegado do Goberno en Asturies do que poida suceder.
A clase obreira está farta de miseria e explotación. Hai que dicir: abonda xa! O
movemento obreiro ten dereito a loitar polos seus intereses sen verse sometido
a este tipo de provocacións. Abonda xa de represión!
Cos mineiros de Cerredo ata a vitoria!
Fóra os antidisturbios das nosas vilas!
Comité de Asturies do PCPE.