O momento é
agora. Traballador,
traballadora de Telemarketing, estanse a negociar as condicións laborais do
noso futuro.
O Convenio
Colectivo de Contact Center caducou no 2014 e durante os derradeiros meses os
sindicatos teñen negociado un novo convenio cunha patronal que non está
disposta a recoñecer as nosas reclamacións. Queren un convenio de resistencia
que soamente vai empeorar a nosa xa precaria situación actual.
As xornadas parciais, a subcontratación, os contratos por obra e servizo, a remuneración por incentivos inalcanzábeis, a falla de descansos durante a xornada laboral, a elevada carga de traballo, a dificultade de conciliación, a contratación por Empresas de Traballo Temporal, os salarios de miseria, as sancións e despedimentos por non vender o produto, a flexibilidade dos horarios, as horas médicas... son os nosos problemas cotiás que han continuar se non os freamos.
E como podemos
acadar un convenio que recolla as nosas aspiracións, que nos permita planificar
unha vida digna de ser vivida? É o momento de tomarmos a palabra e actuar. A
nosa ferramenta é organizar asembleas nos nosos centros de traballo que
recollan as nosas reclamacións, e, a carón das nosas seccións sindicais e
comités de empresa, convertelas en liñas vermellas na mesa negociadora.
Pero ademais
debemos presionar á patronal nos nosos centros de traballo. A loita é o motor
do cambio. O calendario de mobilizacións debe de ser un éxito que amose a nosa
forza, a forza de quen día a día facemos que as empresas dean un servizo e os
patróns teñan os seus beneficios. A forza imparábel da clase traballadora
unida, organizada e combativa.
Non hai escusas.
O que se pode perder nun día de paro ou folga non é máis ca un grao de area no
deserto do que nos xogamos con este convenio. Nós, e todos e todas as que están
a chegar.
SE QUEREMOS
GAÑAR, É A HORA DE LOITAR
COLGAR OS CASCOS
PARA ERGUERMOS O NOSO FUTURO
A ESPERANZA ESTÁ
NA LOITA, E NA ORGANIZACIÓN A VITORIA