As asembleas de traballadores/as do comercio vario da provincia da Coruña acordan ir á folga o día 1 de xullo.
En contra do bloqueo da negociación do novo convenio colectivo e para denunciar as pretensións da patronal de aplicar brutais recortes salariais e laborais.
Logo da ruptura das mesas de negociación polas pretensión da patronal de desmantelar todo o convenio colectivo aplicando un recorte brutal das condicións salariais e laborais, os traballadores e traballadoras do comercio vario da provincia da Coruña acordaron nas distintas asembleas celebradas ao longo das últimas semanas secundar unha xornada de folga o vindeiro luns 1 de xullo, coincidindo co inicio do período de rebaixas.
A folga, que se desenvolverá durante todo o día, afecta a todo o comercio vario –téxtil, comercio de metal, de construción, ópticas, etc.- e a estabelecementos de grandes grupos como Inditex, Cortefield, Dielectro ou Kilovatio Galicia. Porén, non están afectados os grandes almacéns e as perfumerías, pois teñen convenios propios.
O responsábel de comercio da CIG-Servizos, Roberto Pérez, explica que o convenio caducou en xuño de 2011 e por mor da dilatación das negociacións, os traballadores/as do Grupo Inditex sufriron conxelación salarial durante 2012, a pesar dos enormes beneficios obtidos polo xigante do téxtil.
A este respecto, o sindicalista criticou as propias desavinzas entre a patronal, xa que a metade do empresariado non se presentou nas mesas de negociación, unha parte quérese escindir do convenio e a outra parte da patronal presentou dúas plataformas de convenio diferentes.
As propostas empresariais presentadas na mesa, denuncia Pérez, supoñen unha precarización radical das condicións laborais deste colectivo de traballadoras e traballadores.
Entre outras cuestións, a patronal pretende: unha redución do 10% dos salarios para os novos contratos durante os tres primeiros anos; desaparición da cláusula que garante as condicións máis beneficiosas que existen en moitas empresas; supresión da paga extraordinaria de marzo nas empresas que aleguen non ter beneficios (aínda que non especifican como se controlará esta circunstancia); desaparición de todas as categorías e mobilidade absoluta do persoal; diminución da porcentaxe obrigatoria de persoal indefinido; desaparición dos calendarios de traballo anuais por outros de carácter mensual co establecemento dun mínimo de xornada irregular anual do 15%; posibilidade de desprazamento obrigatorio até 50km; ou a retirada do complemento por IT.
Ante as pretensións do empresariado e á vista de que en poucas semanas o convenio perderá a súa vixencia (por mor da limitación da ultraactividade introducida coa reforma laboral), as asembleas de traballadoras e traballadores celebradas nas distintas cidades da provincia acordaron incrementar as medidas de presión e levar a cabo unha xornada de folga para o vindeiro 1 de xullo. Así mesmo, non se descarta a convocatoria de novas mobilizacións, se a patronal continúa coa súa actitude e non atende ás reivindicacións do sector.
[Fonte: CIG]
CCOO sinala que o comercio vario coruñés irá á folga o 1 de xullo para frear a pretensión da patronal de recortar dereitos.
Afecta aos comercios de téxtil, calzado, ópticas, multiprezos, material eléctrico e construción.
A secretaria xeral da Federación de Comercio, Hostalaría e Turismo de Comisións Obreiras de Galicia (FECOHT-CCOO), Isabel Castaño, sinala que o comercio vario da provincia da Coruña irá á folga o próximo 1 de xullo para impedir que a patronal do ámbito recorte dereitos laborais.
O comercio vario agrupa o de téxtil, calzado, ópticas, multiprezos, material eléctrico e construción, e a folga, convocada conxuntamente por CCOO, UGT e CIG, conta co apoio do persoal, que nas asembleas dos pasados 19 e 25 de xuño ratificou esta medida de presión.
Isabel Castaño asegura que «están en xogo as condicións laborais no sector», xa que a patronal se amparou na reforma laboral para rexeitar que o actual convenio continúe vixente mentres se manteñen as negociacións para pactar un novo texto. A isto cómpre sumar que a proposta empresarial é «retrógrada», pois «devólvenos a unha situación de moitos anos atrás».
A secretaria xeral de FECOHT-CCOO de Galicia lembra que levan xa dous anos intentando chegar a un acordo de renovación do convenio, pero as diferentes patronais impedírono. Reprochoulles, ademais, que non todas estean presentes nas negociacións, o que causa tamén un problema de «falta de lexitimidade».
Por último, Isabel Castaño lembra que moitas das empresas do sector están nunha «boa situación económica», razón pola cal cre que «intentan aproveitar a conxuntura da crise para aumentar beneficios á custa de recortar dereitos laborais».
Piquetes informativos.
Haberá piquetes informativos no centro comercial Catro Camiños (A Coruña) ás 8:30 e ás 9:30 na praza Roxa (Santiago de Compostela) e no centro comercial Odeón (Ferrol).
[Fonte: CCOO de Galicia]