O Partido do Traballo de Bélxica (PTB) abandeira a loita dos traballadores como única alternativa ao capitalismo.
Artigo de opinión de J. Jeronimo CR
Que acontece en Bélxica?
A agudización da crise económica e as medidas adoptadas polos diferentes gobernos neoliberais ou socialdemócratas contra os traballadores e as capas populares arrastraron á poboación a un claro síntoma de apatía e resignación polas propostas políticas clásicas a nivel europeo e mundial. As amplas masas de traballadores xa non confían na socialdemocracia e danlle as costas. En Bélxica ao estancamento da economía e ás previsións dun crecemento cero para o próximo curso económico, súmaselle a deslocalización posta en marcha dunha gran parte do sector produtivo do país como Caterpillar Gosselies, Ford Genk e ArcelorMittal, ademais das medidas para desarticular a seguridade social e os servizos públicos.
Ante esta situación o Partido do Traballo de Bélxica, abandeira a loita dos traballadores como única alternativa ao nefasto panorama belga, co obxectivo de construír as novas relacións de poder. Herwig Lerouge dirixente do PTB expoñía así cara a onde debe ir encamiñada esta alternativa:
“É necesario un partido revolucionario que teña en conta o nivel de conciencia actual, que faga seus os problemas da xente, que fale nunha linguaxe accesíbel, que busque a unidade do maior número de persoas posíbel na loita. Pero que non esqueza os seus principios, que manteña o rumbo cara a unha sociedade na que non haxa explotación do home polo home, unha sociedade sen propiedade privada dos medios de produción, unha sociedade na que os traballadores serán realmente libres e cun Estado que protexa a liberdade da vasta maioría contra a opresión dunha minoría”.
O PTB a partir de 2004 deu un salto cualitativo a través do traballo realizado entre as masas, comezouse a albiscar un gran recoñecemento entre a mocidade, o movemento de mulleres e o movemento obreiro e sindical. Datos que se viron reflectidos nas eleccións municipais de 2006, continuando en ascenso ata as eleccións do pasado outubro de 2012. Este crecemento exponencial cuantitativo e cualitativo non só foi contorna aos resultados electorais, senón que ademais no desenvolvemento do traballo do partido coas masas conseguíronse atraer ás súas filas máis de 2.000 novos afiliados, contado na actualidade cuns 7.000 membros. Pódese ser obxectivo e só analizar a influencia dun partido obreiro pola súa participación nas eleccións? Obviamente NON.
O PTB a través do estudo aportou leccións valiosísimas que serviron ao conxunto do movemento comunista e obreiro internacional sobre as nefastas experiencias nos gobernos de coalición cos partidos burgueses para non caer nas desviacións electoralistas (como o partido comunista francés ou italiano). Con respecto a este tema o actual secretario xeral Peter Mertens suscita:
“O Partido comunista francés foi vítima da ilusión de que sería posíbel pola vía parlamentaria exclusivamente, afastar ao pobo da influencia de De Gaulle.312» Noutros termos: Deixen de cegarse coas eleccións e cos resultados electorais (os 30%), máis ben activen ás masas e vaian buscar a forza alí onde está, entre o pobo e non no parlamento” [A clase obreira na das multinacionais].
A situación actual que fixo ao PTB colocarse como un referente á vangarda da clase obreira belga provén de longos e duros anos de preparación para o combate nas frontes, extraendo as experiencias das loitas que libraba o partido, ligándoa ao estudo do socialismo científico, fundíndoo xunto á clase obreira e as amplas masas.
Cal é o futuro que se lle augura ao PTB? As enquisas ás próximas eleccións federais en Bélxica atribúenlle ao PTB que podería contar con representación parlamentaria e colocar ao mozo Raoul Hedebouw como portavoz nacional na cámara. Ademais o PTB atópase actualmente envorcado activamente na realización dun gran traballo para apoiar aos traballadores dos servizos públicos, sanidade, educación, transporte e particularmente en Caterpillar Gosselies, Ford Genk, ArcelorMittal.
Que opina Peter Mertens secretario Xeral do PTB ante a posibilidade de participar nun goberno nacional?
“O contexto en que se atopa actualmente Europa, parece imposíbel participar nun goberno de coalición que non queira romper coa política da Unión Europea. Sen unha maioría coherente que queira levar a cabo un programa contra ela, sen unha gran maioría disposta a mobilizar á poboación en contra desta política, non pode haber ningunha dúbida de que non haberá participación no goberno. En realidade non está na axenda do PTB esa posibilidade”.
E Herwig Lerouge:
“As experiencias confirman as posicións de Marx, Lenin e a Terceira Internacional a este respecto. Rexeitan toda a participación, a excepción das situacións nas que o fascismo constitúa unha ameaza real, no caso dunha situación que poida dar lugar a unha transición cara a un goberno realmente revolucionario, isto é, en situacións prerrevolucionarias importantes con loitas de clase e correlación de forzas favorábel”.
A modo de conclusión; o avance do PTB e a correlación de forzas favorábeis doutros partidos comunistas e obreiros como o KKE que teñen como obxectivo non de palabra senón de feito a revolución socialista, deben de ser estudados polos comunistas e revolucionarios do mundo. Estes partidos proletarios máis avanzados tamén teñen o deber de guiar ao resto de partidos comunistas e obreiros tendo a cautela de non repetir os erros do pasado facendo asimilar as súas experiencias como unha receita á cal aplicar nos nosos respectivos países caendo no seguidismo cego, que probabelmente nos levara a unha práctica mecánica. É por iso que como partidos da revolución debe coidar pola saúde do resto do movemento comunista internacional afastándose de prácticas pouco comúns da nosa tradición revolucionaria como o sectarismo, o dogmatismo e establecendo debates esenciais para desenvolver e fortalecer as organizacións comunistas e obreiras do mundo.
VIVA O PTB! VIVA A CLASE OBREIRA INTERNACIONAL!
[Fonte: PRAVDA Estado español]