Discurso da Secretaria Xeral do CC do KKE no 14º Encontro Internacional de Partidos Comunistas e Obreiros.
[Beirut 22-25 de novembro de 2012]
Tema “Fortalecer as loitas contra a agresividade
imperialista crecente para satisfacer os dereitos socioeconómicos e
democráticos e as aspiracións dos pobos, polo socialismo”
Estimados camaradas:
Quixeramos agradecerlles ter acollido o
encontro nun país, nunha rexión que sofre desde hai anos, e nos últimos días,
xa que a intervención imperialista e a invasión son elementos case permanentes
que marcan todos os niveis da barbarie e do autoritarismo. Grecia tamén está
nesta rexión e por iso sentimos sempre que é noso deber non só expresar a nosa
solidariedade internacionalista senón ademais tomar en conta seriamente os
acontecementos que teñen un impacto tamén no noso país, como
un país capitalista plenamente asimilado nos obxectivos estratéxicos da UE, da
OTAN e dos EE.UU., co acordo voluntario da gran maioría das forzas políticas.
Condenamos o acordo estratéxico asinado entre Grecia e Israel, porque sen
dúbida non ten nada que ver cos intereses comúns dos pobos senón cos obxectivos
estratéxicos antipopulares da burguesía tanto do noso país como do de Israel.
Trátase dunha cooperación estratéxica, tanto militar como económica, que ten
como obxectivo a participación na loita incondicional e implacábel polos
recursos enerxéticos e os recursos da rexión en xeral. Grecia está disposta a
contribuír ás intervencións militares de Israel sobre todo se Israel decide
atacar a Irán. De feito, realízanse exercicios conxuntos con Israel que inclúen
exercicios idénticos ás operacións militares contra Siria ou contra Irán.
Non é casualidade que o goberno grego
non tivo nin unha expresión formal de compaixón ao pobo palestino torturado que
sofre unha vez máis os bombardeos mentres que, ao mesmo tempo, os demais
partidos da oposición basicamente se manteñen en silencio.
Malia que a rexión estivo sufrindo
durante moitos anos a intervención imperialista multifacética para o beneficio
dos gobernos e os réximes reaccionarios, con todo, a situación que
experimentamos nos últimos anos, e hoxe en día, está directamente relacionada
co desenvolvemento da profunda e prolongada crise económica capitalista na zona
euro que ten un impacto directo a nivel mundial e ata nos centros e as
potencias imperialistas establecidas e emerxentes.
A crise que estamos vivindo, que tivo
como punto de partida os EE.UU., é a continuación da crise que estalou a finais
da década de 1990 nos chamados tigres asiáticos, en Rusia así como en países de
América Latina. Ata cando se produciu a recuperación, non logrou a taxa
anterior. Non excluímos a posibilidade dunha recuperación anémica que será
seguida dunha crise máis profunda sincronizada na UE, os EE.UU. e Xapón.
O sistema capitalista non pode
xestionar a crise coa facilidade que o facía antes. Non pode xestionar as
consecuencias da pobreza e da indixencia como o facía antes. Por suposto, isto
non significa que o sistema colapsará por si mesmo, debido ás súas
contradicións, a menos que se forme en cada país un movemento obreiro poderoso,
capaz de levar a cabo un asalto xeral, e preparado cando se produce a situación
revolucionaria, ou cando esta sexa inminente. O movemento revolucionario non
brotará de súpeto; está sendo preparado, está sendo educado, está adquirindo
experiencia nas loitas diarias.
O estalido da crise económica capitalista
sincronizada e xeralizada puxo de relevo o carácter historicamente anticuado e
inhumano do sistema capitalista contemporáneo, a actualidade e a necesidade do
socialismo, a necesidade de reagrupamento do movemento comunista internacional.
A cuestión é qué movemento obreiro, qué
movemento popular pode avanzar no áspero carreiro cheo de curvas, subidas e
baixadas, sen atraparse, sen dexenerarse? A experiencia anterior e recente
proporcionounos unha gran cantidade de probas sobre ese perigo. Que movemento
obreiro e popular se levantará contra a agresividade imperialista, abrirá unha
fronte contra a guerra imperialista e a paz imperialista para que os pobos non
derramen o seu sangue polos intereses dos imperialistas?
A liña para o
fortalecemento do movemento obreiro, a súa alianza cos sectores populares
soamente pode probarse, prepararse e librar batallas diariamente no camiño da
loita emancipada, con obxectivos antimonopolistas e antiimperialistas, a nivel
nacional e en termos de cooperación internacionalista e acción conxunta.
Hoxe en día, o patriotismo
contemporáneo exprésase coa loita polo derrocamento do capitalismo, polo
socialismo. Ningún país capitalista, por moi avanzada que sexa a democracia
parlamentaria, pode garantir a independencia nacional do seu pobo, o respecto
dos dereitos soberanos excepto nun sentido meramente formal e sen contido
substancial.
Seguimos de cerca as reflexións, os
debates no movemento comunista sobre o imperialismo, a estratexia do movemento,
as acusacións que se dirixen contra a política neoliberal de xestión do sistema
capitalista. Na nosa opinión, tal como é importante dar pasos e facer un
progreso na actividade práctica, no esforzo para reunir amplas masas populares
e obreiras, é igualmente importante aclarar cuestións serias da ideoloxía e a
teoría que teñen que ver coa estratexia e a táctica do movemento contra o
imperialismo.
A política que predomina a nivel
mundial non é simplemente unha receita de xestión liberal, como se adoita
afirmar. Independentemente de certas diferenzas entre as receitas liberais e
socialdemócratas, trátase da estratexia contemporánea a favor dos monopolios
que foi elaborada logo da crise de 1971-1973 como unha resposta ao problema da
tendencia decrecente da taxa media de ganancia en condicións de antagonismo
interimperialista mentres que o desenvolvemento desigual agudízase dado que é
inherente ao sistema capitalista internacional.
Un compoñente da política contemporánea
a favor dos monopolios é a forza de traballo barata, as reestruturacións
reaccionarias, as “liberalizacións”, as privatizacións, a intervención
imperialista e a guerra pola redistribución dos mercados.
Esta liña política a favor dos
monopolios foi e segue sendo seguida por forzas gobernamentais burguesas
liberais e socialdemócratas, así como por gobernos da centroesquerda, nos
últimos trinta anos. Iniciou nos EE.UU. e Gran Bretaña e logo estendeuse á UE.
No século XX tanto a xestión liberal como a xestión keynesiana non puideron,
nin poden, cancelar a crise económica e a guerra imperialista.
Un asunto principal é convencer á maior
parte posíbel da clase obreira, do pobo traballador a cerca do verdadeiro
carácter da crise, como unha crise de sobreacumulación sobre a base da
propiedade capitalista e da explotación clasista; confrontar con argumentos o
esforzo sistemático de desinformar e ocultar para encubrir as verdadeiras
causas e os factores da crise, as teorías sobre o “capitalismo casino”, a
teoría de que a crise se debe exclusivamente ao sistema financeiro, ao “consumo
excesivo” así como ao seu contrario, ao “subconsumo”.
O movemento obreiro e os seus aliados
non deben quedarse atrapados nas diversas fórmulas de xestión da crise que
aparecen hoxe na UE así como a nivel internacional porque non existe unha
fórmula de saída da crise a favor do pobo. Todas as fórmulas que foron
claramente expresadas, baséanse na forza de traballo barata, afectan a un gran
número de sectores pequenos e medianos e apoian as reestruturacións
capitalistas.
Hoxe en día hai un debate intenso e existen
serios desacordos entre os estados membros da UE, entre sectores da burguesía
en cada país, entre os partidos políticos burgueses sobre se unha creba
controlada é a solución, sobre se a zona euro debe permanecer intacta, sobre se
a UE debe transformarse nunha federación que posibelmente conducirá á expulsión
dalgúns Estados, etc.
Ademais, círculos políticos burgueses e
empresariais fomentan a teoría de que a saída da zona euro ou ata da UE
axudaría a un goberno burgués a liberarse dos compromisos da moeda única, a
imprimir o seu propio diñeiro, a atraer inversores que apostan por unha moeda
nacional barata, etc.
Esta posición ten un carácter clasista
na medida que se promove por sectores da burguesía e especuladores; non ten
nada que ver coa posición clasista do KKE sobre o poder obreiro e popular, a
retirada da UE, a cancelación unilateral da débeda e a socialización dos
monopolios, cooperativas de produción agrícola populares que estean integradas
en certo grao na planificación central.
As forzas oportunistas que toman unha
posición en contra da receita alemá, promoven a relaxación da política fiscal e
a creba controlada, así como a idea de que existe un programa político de
transición de loita e poder que pode equilibrar os intereses dos monopolios e do
pobo traballador. Tal programa gobernamental que ten resultados favorábeis
tanto para os monopolios como para os pobos non existiu en ningún lugar, nin
existe hoxe, é dicir no sentido de ser confirmado no ámbito nacional ou nun
grupo de países. Non é casualidade que non se menciona nin un país como exemplo
da aplicación desta opción.
Estamos nun período en que as
contradicións interimperialistas en condicións dunha crise profunda están
empuxando a sectores da burguesía, a toda a burguesía dun país ou outro para
elixir se permanece nun campo imperialista ou se vai a outro, para decidir á
beira de que potencia imperialista lle convén estar. Ademais, nas alianzas
imperialistas prodúcense realineamentos o cal é un asunto fluído que na nosa
opinión está relacionado coa rexión máis ampla do Mediterráneo Leste e ata
África do Norte.
A alineación do movemento obreiro e dos
seus aliados cunha ou outra fórmula de xestión, cunha ou outra potencia
imperialista significa submisión e alistamento baixo unha bandeira allea.
Vexamos como son as cousas na zona euro.
A burguesía alemá e a burguesía
francesa enfróntanse a dilemas serios en canto ao futuro da zona euro. Malia as
súas contradicións concluíron, como sucedeu no pasado, a un compromiso temporal
fráxil que non alivia en absoluto a barbarie das medidas contra os
traballadores e das reformas reaccionarias, e ademais non nega as causas da
agudización das contradicións interimperialistas.
A tendencia dominante da burguesía
alemá suscita como prioridade o fortalecemento do euro, a estabilidade
monetaria, e négase a asumir o custo da depreciación do capital nos países
altamente endebedados. Unha segunda tendencia que está cobrando forza na UE é a
que quere manter intacta a zona euro para que o mercado europeo non se contraia
ante o duro antagonismo internacional. Unha terceira tendencia cuestiona a
forma actual da zona euro no seu conxunto e dá prioridade a achegarse ao eixo
China-Rusia.
Os gobernos burgueses, os partidos
liberais e socialdemócratas así como os chamados partidos da esquerda, da
renovación, alinéanse detrás das forzas que expresan as contradicións e tratan
de asimilar ao movemento obreiro e aos seus aliados nunha ou outra versión de
xestión que esquematicamente a unha se caracteriza como restritiva e a outra como
expansiva.
Estamos seguros dunha cousa -sen
subestimar as dificultades que traen as ilusións e as visións utópicas no
fortalecemento do movemento-, que obxectivamente maiores sectores da clase
obreira entrarán en conflito coas solucións de xestión burguesa que trata de
controlar a extensión da depreciación de capital e a distribución do dano entre
os seus diferentes sectores.
Os partidos comunistas, a vangarda
radical, non deben perder a independencia de xuízo e acción ante os varios
bloques que están de lado dunha ou outra potencia imperialista, cun sector da
burguesía en contra doutro, a favor dos estratos intermedios altos.
O carácter anticapitalista,
antimonopolista, da loita debe fortalecerse e desde este punto de vista débense
tratan os compromisos e a dependencia que sofren os países e os pobos que están
integrados nas unións imperialistas como a OTAN e a UE.
O carácter do patriotismo contemporáneo
coincide co derrocamento do poder burgués e a propiedade capitalista dos medios
de produción, a retirada de toda coalición interestatal capitalista e alianza
imperialista.
Polo tanto, a chamada fronte anti-alemá
ou a fronte antiamericana, é dicir contra os EE.UU., por si soa non pode
expresar ou facer fronte á loita contra o imperialismo, contra as consecuencias
da crise. Tampouco debemos pasar por alto que o capitalismo monopolista, é
dicir o imperialismo, determina o destino e o curso dos estados que non
pertencen organicamente a unións imperialistas. Hoxe en día non existen países
que non estean conectados dun xeito ou outro ao sistema global e rexional do
imperialismo, é dicir ao mercado capitalista mundial, aos seus mercados
rexionais. A vía de desenvolvemento capitalista é a vía que conduce á
incorporación máis frouxa ou máis estreita no sistema imperialista e polo tanto
a loita antiimperialista é anticapitalista, xa que nos atopamos na fase
imperialista do capitalismo.
Os pobos non se volven máis combativos
cando se deixan influír por opinións que separan a política imperialista do
capitalismo monopolista, cando identifican o imperialismo soamente coas
relacións internacionais desiguais, coa intervención imperialista e a guerra, é
dicir cando separan as contradicións internas das interimperialistas.
O Partido Comunista debe ter un papel
dirixente na organización independente da resistencia obreira e popular en
todas as súas formas para que a resistencia se conecte coa loita pola completa
derrota da burguesía, doméstica e estranxeira, como un invasor, para conectar
na práctica a loita contra a guerra pola toma do poder. Por iniciativa e coa
dirixencia do Partido débese formar unha fronte obreira e popular con e nas
formas de actividade, baixo o lema: o pobo proporcionará a liberdade e a saída
do sistema capitalista, que mentres predomina trae a guerra e a paz cunha
pistola na cabeza do pobo.
Hoxe, en Grecia apoiamos a Alianza
Popular que expresa os intereses da clase obreira, dos semi-proletarios, dos
pobres traballadores autónomos e dos campesiños, así como dos científicos que
traballan por conta propia que aínda que teñen maior liberdade que os
traballadores asalariados, se converterán cada vez máis en asalariados en
grandes empresas capitalistas con baixos ingresos, ou en desempregados ou
semi-empregados. Desde este punto de vista rexeitamos todo apoio ás forzas
políticas que apoian unha ou outra fórmula de xestión.
Hoxe en día en Grecia lévanse a cabo
procesos de reforma do sistema político, xa que o sistema de alternancia
bipartidista da ND liberal e do PASOK socialdemócrata non pode funcionar máis,
sobre todo debido á desintegración do PASOK. Unha gran parte do aparello do
PASOK, de sectores da aristocracia obreira e do sindicalismo pactista, de
sectores das capas medias que operaban como satélites dos monopolios, xestionaban
unha parte das subvencións da UE, cambiaron de partido, trasladáronse a SYRIZA
que se está transformando dun partido oportunista no sucesor da
socialdemocracia, gardando algunhas consignas co fin de manter o perfil da
renovación da esquerda comunista.
O KKE resistiu a gran presión que foi
exercida para tomar parte nun goberno con SYRIZA no seu núcleo, é dicir nun
goberno cuxas posicións programáticas terían unha clara dirección de apoio ao
desenvolvemento capitalista, con contradicións que determinan de antemán a súa
plena asimilación cando se converte en maioría gobernamental. Esta posición
trouxo un custo electoral pero non privou o partido da súa capacidade logo das
eleccións de mobilizar e organizar ás masas populares. É un legado para o
futuro para un movemento que evitará as trampas perigosas e os erros que poden
danar os intereses populares e que finalmente o esmagarán por un período de
tempo longo e crucial.
O KKE deixou a súa posición clara desde
o primeiro momento das mobilizacións nos países de África do Norte así como do
inicio do conflito armado en Siria. Calquera que sexa a participación popular,
en particular en Exipto e Túnez, sinalou sen dúbida os problemas populares no
país, os dereitos dos traballadores, o desexo dun cambio de política. Pero non
podemos pechar os ollos ante o feito de que foron provocados ou utilizados
polas potencias imperialistas fortes encabezadas polos EE.UU. e os seus
antagonistas polo control dos recursos naturais, co fin de cambiar o goberno
por forzas que o podían controlar mellor. Dixemos claramente que foi parte do
plan que Bush declarara como plan de “democratización” dos países árabes e do
mundo árabe. Os acontecementos en Siria teñen as súas raíces nos problemas
económicos, sociais e políticos que están experimentando a clase obreira e as demais
capas populares. Pero nós opoñémonos a calquera intento dunha intervención
imperialista dos EE.UU., a UE, a OTAN, Israel, Turquía, Qatar, Arabia Saudita.
puxemos de manifesto ao pobo grego que os EE.UU., a UE e Israel están
interesados en desestabilizar e debilitar a correlación de forzas no réxime
burgués sirio, porque o seu liderado é un aliado de Palestina e Líbano, oponse
ás posicións e aos plans imperialistas dos EE.UU., a OTAN e Israel, hoxe está
bombardeando Gaza sen piedade e está ocupando territorios palestinos, libaneses
e sirios. O debilitamento, o derrocamento do réxime sirio abre o apetito dos
imperialistas para atacar Irán, para proceder a novos desmembramentos de
estados na rexión, é dicir un efecto dominou de desestabilización e de derramamento
de sangue que traerá novas guerras e intervencións imperialistas.
Consideramos que todos debemos
traballar na loita antiimperialista-antimonopolista común polo desencadeamento
dos organismos imperialistas, a eliminación das bases militares estranxeiras e
dos nucleares, o regreso das forzas militares das misións imperialistas e a
integración desta loita na loita polo poder.
[Fonte:KKE]
Traducido por FORXA!