A CIG rexeita a abusiva proposta de servizos mínimos presentada pola Xunta para a folga do día 14 de novembro.
A CIG trasladou esta mañá a súa total oposición á proposta de servizos mínimos presentada pola Xunta de Galiza para a folga do día 14 de novembro por considerala arbitraria, desproporcionada e falta de motivación. A central sindical entende que con este borrador de servizos mínimos non queda garantido o lexítimo exercicio do dereito á folga do conxunto do persoal que traballa para a administración galega. Por iso, a central nacionalista advirte que, de non producirse un cambio substancial, presentará recurso contencioso-administrativo.
A proposta
presentada pola Consellaría de Facenda esta mañá ás centrais sindicais afecta
ao persoal que traballa nos servizos, sectores e actividades baixo competencia
da Xunta: seguridade, protección civil, medios de comunicación social, rexistro,
educación, bombeiros, transportes, etc...
Mañá terá lugar a
resposta por parte da administración, en canto as alegacións propostas pola CIG,
nas que se recollen as conclusións do auto do Tribunal Superior de Xustiza de
Galiza do ano 2002.
A central sindical,
agarda unha resposta en positivo, aínda que todo semella indicar que, dada a
actitude da administración será difícil. De feito, a CIG denuncia que a
proposta do Goberno galego supera incluso os servizos mínimos estabelecidos para
folgas anteriores. A este respecto cómpre subliñar que tanto o Tribunal
Superior de Xustiza de Galiza e máis o Tribunal Supremo a instancias de recursos
presentados pola CIG consideraron excesivos e abusivos os servizos mínimos
decretados pola Xunta de Galiza.
Para a CIG resulta
especialmente grave que a Xunta que malia estes antecedentes legais, a
administración teime en conculcar dereitos fundamentais de xeito reiterado, cando
debería ser a primeira en velar pola defensa destes dereitos e a primeira en
cumprir as resolucións dos tribunais de xustiza.
Así as cousas, de
non mudar substancialmente a proposta na xuntanza convocada para mañá mércores,
a CIG anuncia que vai presentar recurso, xa que entende que o punto de partida
para a negociación do decreto de servizos mínimos do día 14 de novembro ten que
ser o auto do 19 de xuño de 2002 da sala do contencioso-administrativo do TSXG,
que di: “enténdese que os servizos mínimos que hai que fixar para o período de
folga convocado non poderán exceder en cada centro, departamento ou oficina, do
número de persoas que normalmente permanecen neles con ocasión dun domingo ou
día festivo, salvo que se trate de órganos que tales días permanecen pechados,
no que haberá que atenderse ás quendas estabelecidas para os sábados”.
Porén, a Xunta
ignora todas estes mandatos xudiciais e, unha vez máis, volve marcar unha
actividade mínima claramente abusiva, co obxectivo de impedir aos
traballadores/as ao servizo das administracións galegas que exerzan o seu
lexítimo dereito á folga.
Servizos abusivos no ensino
No caso do ensino
non se aplica o auto do TSXG, xa que de cumprirse o estabelecido polo alto
tribunal galego ningún centro debería estar en funcionamento o día 14 de
novembro, posto que nas fins de semana as escolas ou universidades permanecen
pechadas.
Ademais, a CIG
considera especialmente intolerábel que a Xunta volva privar dos seus dereitos
ao persoal das escolar unitarias, xa que obriga á presenza dalgún/ha membro
docente naqueles centros con menos de seis unidades.
Transporte escolar e de traballadores/as
A CIG solicitou a
retirada como servizo mínimo, do transporte de escolares e dos
traballadores/as. A central sindical considera que esta non é unha folga
específica do sector do transporte, senón que ten carácter xeral e dun só día.
Darlle a consideración de especial a este tipo de transporte imposibilita que
os traballadores e traballadoras das compañías que prestan o servizo poidan
exercer o seu dereito.
Administración de Xustiza
A central
nacionalista solicitou a presenza nos xulgados e dependencias de xustiza dos
servizos correspondentes a domingos ou sábados.
Televisión e radio galegas
Administración e
comités de empresa negocian a aplicación da sentenza do Tribunal Supremo do 19
de xullo de 2012.
[Fonte: Avantar]