| Raúl Martínez |
Levamos meses mergullados nunha campaña electoral
constante baseada nunha soa premisa: o voto útil. Os partidos capitalistas,
tanto de esquerda como de dereita, trátannos coma se fósemos bobos, pedíndonos
que o noso voto sexa útil. Pero útil, para quen? Esa é a cuestión.
O PSOE é o responsable da reconversión industrial, da
legalización das ETT, das varias reformas laborais que estenderon a
precariedade e abarataron o despedimento, da reforma do artigo 135 da
Constitución para supeditar a riqueza do país aos intereses empresariais, do
ingreso de España na OTAN, da implicación do país en guerras criminais, etc.
Cada cal pode engadir o que considere… É útil o voto ao PSOE para os
traballadores? Non, é realmente complicado volver ao lobo vexetariano, por
moito que se tente. E levamos corenta anos coa mesma cantilena.
Podemos, ou como queira que se chamen agora, tamén
apela ao voto útil. Piden que lles votemos para que o PSOE non goberne con Ciudadanos,
para que haxa un “goberno de esquerdas”. Ou sexa, en resumidas contas: piden o
noso voto para que goberne o PSOE, se é posible, con eles. Niso quedou “a
esquerda”? Pois si, unha esquerda cada día máis domesticada que se conforma con
rogarlle a papá PSOE un oco no goberno capitalista de quenda.
En realidade
ese voto, tanto a uns como a outros, si que é útil. É útil ao
capitalismo e é útil aos capitalistas, que se retorcen de risa vendo o programa
de máximos da coalición neosocialdemócrata. E basta con axitar o espantallo da
extrema dereita para que ese programa se converta no mínimo do mínimo, nunha
xestión moderada do capitalismo, sen molestar no máis mínimo a quen ten o poder
e a riqueza que producimos nas súas mans.
Tómannos por parvos, así de claro. E nas Eleccións
Europeas verase con toda claridade. O europeísmo entusiasta do PSOE co
europeísmo crítico de Podemos, será entusiasta ou crítico, pero é europeísmo.
Claro, europeísmo no sentido de defensa da Unión Europea e os seus monopolios,
esa que dita os recortes e a eliminación dos nosos dereitos que os enganabobos
logo nos aplicarán aquí empregando a esa Unión Europea, precisamente, como
desculpa.
A socialdemocracia, nas súas diferentes variables, ten
a función esencial de integrar a clase obreira no capitalismo, de supeditala ao
poder dos empresarios. Nos sistemas democrático-burgueses a teoría do voto útil
mostrouse sempre eficaz. Por tanto é
necesario un esforzo ideolóxico e político para desenmascarar diante da clase
obreira este tipo de manobras e, con elas, á propia socialdemocracia.
Nin o PSOE nin Podemos representan os intereses dos
traballadores e traballadoras de España, e pronto se encargarán de demostralo.
Non debe haber tregua na loita pola nosa independencia política, organizativa e
ideolóxica.
Fonte: Nuevo Rumbo
Traducido por Revista FORXA