Diante do
anuncio polo goberno de Feijóo da convocatoria adiantada das eleccións galegas
para o vindeiro 5 de abril, o Comité
Nacional do PCTG quere manifestar o seguinte.
Este
adiantamento, que mereceu o respaldo expreso da patronal galega, persegue dous
obxectivos: colocar atrancos administrativos e prazos inasumibles aos seus
adversarios políticos para a concorrencia electoral, así como de minimizar o impacto do desgaste (que podería
poñer en perigo a maioría absoluta do executivo do PP) producido pola vaga mobilizadora con que
amplos sectores están a responder á ofensiva que mantén o goberno da patronal
contra os nosos dereitos e servizos
públicos.
As e os
comunistas imos concorrer a esta convocatoria electoral situando con claridade
que queremos botar a Feijóo do goberno,
pero que as políticas regresivas, antiobreiras e antipopulares, foron, son e serán aplicadas tanto por
gobernos conservadores como por gobernos socialdemócratas, alén de contar co
apoio e a colaboración de forzas políticas periféricas de toda cor política. As
súas políticas son as mesmas: submisión
aos mercados e ao capital.
Queremos
botar a Feijóo do goberno, pero sobre todo queremos desaloxar do poder á clase
parasitaria que el representa.
As altas
taxas de desemprego, a expansión da pobreza, a abolición dos dereitos laborais
e de seguridade social, o ataque contra á negociación colectiva, a
mercantilización da sanidade, do benestar e da educación, as privatizacións e a
desregulación de ramas e sectores da economía, son características do
capitalismo.
Durante
estes 5 anos de “crecemento” económico, non recuperamos as condicións de vida e
traballo anteriores á crise, que xa eran malas antes. Milleiros de
traballadores non dan chegado a fin de mes. Milleiros de familias do noso país
malviven dunha pensión. Ducias de empresas industriais pecharon ou ameazan con
desaparecer, deixando un regueiro de desemprego e emigración. Nós non
esquecemos Poligal, Alcoa, Endesa, e tantísimas outras. E sobre este panorama
de partida, xa está a amortecer o ciclo expansivo que sucedeu á última crise, e
que só beneficiou aos grandes empresarios pero nunca aos nosos salarios e
condicións de vida. Os indicadores macroeconómicos caen, anunciando unha nova
crise altamente acelerada e sincronizada que terá nefastas consecuencias para a
clase obreira e o pobo traballador galego.
O
programa da Coalición, chamada Progresista, que pactaron no goberno de Pedro
Sánchez as socialdemocracias, a vella e a nova, e o reformismo, amosa con claridade os límites do que a clase obreira e as capas
populares poden agardar de calquera das fórmulas da xestión capitalista. Un
programa expresamente comprometido coa “necesaria competitividade empresarial”
dos monopolios españois, cos obxectivos e restricións orzamentarias ditadas
pola UE e os organismos financeiros internacionais do capital, e coa
contrarreforma laboral de 2010.
A
socialdemocracia e os seus aliados están dispostos a aplicar con man dura as
políticas de axuste duro, privatización, flexibilización do mercado laboral e
ataque contra os salarios e as condicións de vida, que vai necesitar, no marco
da nova crise de sobreprodución e sobreacumulación que se aveciña, o gran
capital, a quen serven como xestores. Xa o demostraron en Grecia con Syriza, e
vémolo hoxe en Francia con Macron.
A clase
obreira e os sectores populares necesitan un programa e unha organización
política propia. Un programa e un Partido Comunista para avanzar na
recuperación dos dereitos arrebatados e na conquista de novos dereitos sociais,
económicos, políticos e culturais, polo pleno emprego, por unha vivenda digna,
por unha sanidade e unha educación universais, públicas, gratuítas e de
calidade, pola nacionalización dos sectores estratéxicos da economía e pola
soberanía industrial, enerxética e agraria do país, pola ruptura coas
estruturas imperialistas e as alianzas monopolistas internacionais, económicas, políticas e militares.
O Partido
Comunista dos Traballadores da Galiza presentarase ás vindeiras eleccións
galegas para facer avanzar o programa independente da clase obreira, para
asegurar ao conxunto das traballadoras e os traballadores galegos a
posibilidade de elixirse a si mesmas, de elixir o necesario, de votar polo seu
propio programa de clase.
Chamamos
á clase obreira galega a apoiar o PCTG durante a campaña electoral que vén, a
tomar contacto co Partido para coñecer a súa proposta política e a fortalecer
as fileiras do Partido Comunista diante das importantes loitas que se anuncian
no horizonte.
Por un
país para a clase obreira!
Galiza
obreira en pé!
Comité
Nacional do Partido Comunista dos Traballadores da Galiza (PCTG)
Santiago de Compostela, 11 de febreiro 2020